ಸುವ್ಯಕ್ತಿಪುದೆ ಚೋದ್ಯ

ಅವ್ಯಕ್ತನಾದವನ ವ್ಯಕ್ತನಾಗಿಸಿ ಮತ್ತೆ
ಸುವ್ಯಕ್ತ ತತ್ತ್ವದೊಳು ಬಂಧಿಸುತಲವನ
ಅವ್ಯಕ್ತನನು ರಾಗರಸಗಳಿಂ ಚಿತ್ರಿಸುತ
ಸುವ್ಯಕ್ತಿಪುದೆ ಚೋದ್ಯ ಜಾಣಮೂರ್ಖ //

ನಿರಾಕಾರ ಸ್ವರೂಪನಿಗೆ ಶೂನ್ಯನೆಂದೆವು ! ಲಿಂಗರೂಪ ಎಂದೆವು ! ಮತ್ತೆ ಆ ಲಿಂಗರೂಪಿಗೆ ಕಣ್ಣು ಕಿವಿಗಳನ್ನಿಟ್ಟು ಅಂಗರೂಪಿಯನ್ನಾಗಿಸಿದೆವು. ಇದು ನಮ್ಮ ಭಕ್ತ್ಯಾಭಿವ್ಯಕ್ತಿಯ ಒಂದು ರೂಪವೇ ಹೌದು. ಹೋಗಲಿ ಎಂದರೆ ಆ ಶಿವನಿಗೆ ಶೃಂಗಾರಾದಿ ರಸಭಾವಗಳನ್ನು ಮುಖದಲ್ಲಿ ತಂದು ಶಾಂತಶಿವ , ರೌದ್ರಶಿವ , ತಾಂಡವನೃತ್ಯಹರ ಹೀಗೆಲ್ಲಾ ಭಾವಕ್ಕನುಗುಣವಾಗಿ ಸ್ತುತಿಸಿ ಸಂತೋಷ ಪಟ್ಟೆವು. ಸ್ಮಶಾಣ ವಾಸಿಯಾಗಿಸಿದೆವು , ಮನವ ಹೂವಾಗಿಸದೆ ಬಾಡುವ ಭೌತಿಕ ಹೂ ಪತ್ರೆಗಳಿಂದ ಮುಚ್ಚಿಬಿಟ್ಟೆವು ! ಇದೇ ನೋಡಿ ಅಚ್ಚರಿ ! ಅವ್ಯಕ್ತನನ್ನು ವ್ಯಕ್ತಿಸಿದುದು ಮಾತ್ರ ನಮ್ಮ ಅದ್ಭುತ ಸೃಜನಶೀಲತೆಗೋ , ಭಕ್ತಿಗೋ (ಡಾಂಭಿಕವಾಗದಿದ್ದರಾಯ್ತು) ಹಿಡಿದ ಕನ್ನಡಿ. ಆದರೆ ಶಿವ ಎಷ್ಟಾದರೂ ಶಿವನೇ ! ಭಕ್ತರು ಯಾವ ರೂಪಿಂದೆ ನೋಡ ಬಯಸಿದರೆ ಹಾಗೆಯೇ ಪ್ರಕಟ !! ಪ್ರೇಮಮಯನೂ , ಪ್ರೇಮ ಸ್ವರೂಪನೂ ಆದ ಶಿವನನ್ನು ಭಕ್ತಿಯಿಂದ ಸ್ತುತಿಸುವ ಮಹಾ ಶಿವರಾತ್ರಿ ಇಂದು. ದಯಾಮಯನಾದ ಶಿವನು ಎಲ್ಲರಿಗೂ ಸನ್ಮಂಗಳವನ್ನುಂಟುಮಾಡಲೆಂಬ ಭಕ್ತಿಪೂರ್ವಕ ಪ್ರಾರ್ಥನೆಯೊಂದಿಗೆ ಎಲ್ಲರಿಗೂ ಮಹಾ ಶಿವರಾತ್ರಿಯ ಶುಭಾಶಯಗಳೊಂದಿಗೆ

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)