ಅಂಬುಧಿಯ ಮಂಥನದೊಳಿಂದ್ರನೈರಾವತಕೆ
ಶಂಭು ಚಂದಿರನಂತೆ ಹರಿ ಲಕುಮಿಗೊಲಿಯೆ !
ಕುಂಭದಮೃತವ ಬಯಸೆ ವಿಷವುದಿಸಿತೈ ಬಿಡದೆ
ತುಂಬಿದೀ ಬದುಕಂತೆ ಜಾಣಮೂರ್ಖ //
ಸಮುದ್ರ ಮಥನ ಕಾಲದಲ್ಲಿ ಸುರರರಸು ಇಂದ್ರನು ಐರಾವತ ಬೇಕೆಂದರೆ , ಚಂದ್ರನನ್ನು ಶಿವನು ತನಗಿರಲೆಂದು ಚಂದ್ರನನ್ನು ಧರಿಸಿ ಚಂದ್ರಧರನಾದನು. ಶ್ರೀಹರಿಯು ಸಾಕ್ಷಾತ್ ಲಕ್ಷ್ಮೀ ದೇವಿಯನ್ನೇ ಸತಿಯಾಗಿ ಪಡೆದನು. ಸುರಾಸುರರು ಅಮೃತವನ್ನು ಬಯಸಿದರು. ಧನ್ವಂತರಿಯು ಅಮೃತವನ್ನು ತಂದರು ಇತ್ಯಾದಿ ಕಥೆಯೆಲ್ಲವೂ ಎಲ್ಲರಿಗೂ ಗೊತ್ತು. ಆದರೆ ಸೂಕ್ಷ್ಮವೇನೆಂದರೆ ಹಾಲಾಹಲವು ಉದಿಸಿದುದು. ಇವೆಲ್ಲಾ ಐಶಾರಾಮಿ ದಿವ್ಯತ್ವಪೂರಿತವಾದವುಗಳ ನಂತರ ಕೊನೆಯಲ್ಲಿ ಹುಟ್ಟಿದುದು ವಿಷ ! ಇದುನ್ನು ಬದುಕಿಗೆ ಸುಂದರವಾಗಿ ಸಮನ್ವಯಿಸಬಹುದು. ಹೆಚ್ಚು ಆಸೆಪಟ್ಟರೆ ನಂತರ ದುಃಖ ಕಟ್ಟಿಟ್ಟ ಬುತ್ತಿ. ಭಗವಂತನ ಸೃಷ್ಟಿಯಲ್ಲಿ ಎಲ್ಲವೂ ಇದೆ. ಬೇಕಾದುದು ಸಿಗುತ್ತದೆ. ಆದರೆ ಅತಿಯಾಸೆ ಪಟ್ಟರೆ ಸುಖವೆಂತೋ ಅಂತೆ ದುಃಖವೂ ಸಿಗುತ್ತದೆ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
