ಹೊತ್ತುಹೋಹುದು ಬದುಕೊ

ಹೊತ್ತು ಮೆರೆವುದೆ ಮತ್ಸ್ಯ ಮತ್ತು ರತ್ನಂಗಳನು
ಎತ್ತಿಕ್ಕುವವೆ ಖಗ ಮೃಗಾದಿಗಳು ಕೂಳ !
ಮಿತ್ತುವಿದೆ ಕೂಗಿಡುವ ಚಿತ್ತವೃತ್ತಿಯದೇಕೆ
ಹೊತ್ತುಹೋಹುದು ಬದುಕೊ ಜಾಣಮೂರ್ಖ //

ಸಮುದ್ರದ ತಳ ಮತ್ತು ರತ್ನಗಳ‌ ಆಗರವಾದರೂ ಅಲ್ಲಿನ ಮೀನಾಗಲಿ ಅಥವಾ ಇತರೆ ಜಲಚರಗಳಾಗಲಿ ಅವುಗಳ ಬಗ್ಗೆ ಲಕ್ಷ್ಯ ನೀಡುವವೇನು !? ಅವನ್ನು ಹೊತ್ತು ತಿರುಗುವವೇನು !? ನಾವು ನೀಡುವಷ್ಟು ಪ್ರಾಶಸ್ತ್ಯವನ್ನು ಅವು ನೀಡವು ! ಅದುಬಿಡಿ . ಖಗಮೃಗಾದಿಗಳನ್ನು ನೋಡಿ ! ಅವು ನಾಳೆಗೆ ಅಂತ ಏನನ್ನೂ ಕೂಡಿಡೋದಿಲ್ಲ ! ಈ ಪ್ರಕೃತಿಯಲ್ಲಿ ತುಂಬಾ ಸಂತೋಷವಾಗಿ ಬದುಕಿಬಿಡುತ್ತವೆ. ಜೀವನದ ಅದಾವ ಸತ್ಯ ಅವುಗಳಿಗೆ ತೀಳಿದಿದೆಯೋ ಬಲ್ಲವರಾರು !? ಎಷ್ಟು ನಿರ್ಲಿಪ್ತವಾಗಿ ಬದುಕುತ್ತವೆ ಅವು !? ಮೃತ್ಯು ನಿಶ್ಚಿತವೆಂದು ತಿಳಿದಿದ್ದರೂ ನಾವು ಅಬ್ಬರಿಸಿ ಬೊಬ್ಬಿರಿಯುತ್ತೇವೆ. ಬದುಕಿನಲ್ಲಿ ಇಲ್ಲದ ನಿರೀಕ್ಷೆಗಳನ್ನಿಟ್ಟುಕೊಂಡು ದುಃಖಪಡುತ್ತೇವೆ. ಓ ಗೆಳೆಯ ಇನ್ನಾದರೂ ಶಾಂತಿಯಿಂದ ಬದುಕೋಣ. ಚಿರಸುಖವನರಸುತ್ತ , ಬದುಕಿನ ಸೂಕ್ಷ್ಮತೆಗಳನ್ನೂ , ಅಚ್ಚರಿಗಳನ್ನೂ ಕಂಡು ಬೆರಗುಗೊಳ್ಳುತ್ತಾ , ಭಗವಂತನ ಸೃಷ್ಟಿಯ ದಿವ್ಯತ್ವವನ್ನು ಕಂಡು ಸಂತಸಪಡುತ್ತಾ ಬದುಕನ್ನು ಕಳೆಯಬೇಕಿದೆ. ಹೊತ್ತೇನೂ ಯಾರಿಗಾಗಿಯೂ ನಿಲ್ಲುವುದಿಲ್ಲ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)