ಹೊಟ್ಟೆ ತುಂಬಿದರಾಯ್ತೆ !

ಹೊಟ್ಟೆ ತುಂಬಿದರಾಯ್ತೆ ಕೆಟ್ಟ ಹಸಿವಿಂದ್ರಿಯಕೆ
ಬಟ್ಟೆಗಾಣದ ಬದುಕು ಸಿಟ್ಟೇಕೆ ಮಾಳ್ಪೆ ?
ಹೊಟ್ಟೆ ಕೊಟ್ಟಿಹ ದೇವ ರಟ್ಟೆಗಿಟ್ಟಿಹ ಬಲವ
ಕೊಟ್ಟ ಚಿಂತನೆಗರಿವ ಜಾಣಮೂರ್ಖ //

ನೋಡಿ ಇದೆಂತಹಾ ವಿಚಿತ್ರ ! ಸ್ವಲ್ಪ ಹಾಗೇ ಗಮನಿಸಿ ! ಹಸಿವು ಯಾರಿಗಿಲ್ಲ ! ಅದಕ್ಕೇ ದುಡಿದು ತಿನ್ನಲೆಂದು ದೇವರು ಹೊಟ್ಟೆಗೆ ಹಸಿವೆಂತೋ ಅಂತೆ ರಟ್ಟೆಗೆ ಬಲವನ್ನೂ ಕೊಟ್ಟಿದ್ದಾನೆ. ಆದರೂ ಕೆಲವೊಮ್ಮೆ ಹಸಿವಿನ ತಮಣೆಯ ದಾರಿ ಕಾಣದೆ ಮನಸ್ಸು ಕೋಪದಲ್ಲೋ , ಕಣ್ಣೀರಿನಲ್ಲೋ ಪರ್ಯವಸಾನವಾಗುತ್ತದೆ. ಹಸಿವು ಕೇವಲ ಹೊಟ್ಟೆಗೆ ಮಾತ್ರವಲ್ಲ. ಇಂದ್ರಿಯಗಳ ಹಸಿವು ಇದಕ್ಕಿಂತ ತುಂಬಾ ತೀಕ್ಷ್ಣ ಮತ್ತು ತೀವ್ರತರವಾದದ್ದು. ಆದರೆ ನಾವು ಹೊಟ್ಟೆಯ ಹಸಿವನ್ನು ಗಣನೆಗೆ ತೆಗೆದುಕೊಂಡಷ್ಟು ಇಂದ್ರಿಯಗಳ ಹಸಿವಿನ ಕಡೆಗೆ ಗಮನ ನೀಡುವುದೇ ಇಲ್ಲ ! ಎಲ್ಲರೂ ಮಾಡುವುದು ಹೊಟ್ಟೆಗಾಗಿ ! ಗೇಣು ಬಟ್ಟೆಗಾಗಿ ! ತುತ್ತು ಹಿಟ್ಟಿಗಾಗಿ ! ಆದರೆ ಇಂದ್ರಿಯಗಳ ಹಸಿವಿನ ಕತೆ !? ತುಂಬಾ ಸಾತ್ವಿಕವಾದ ರೀತಿಯಲ್ಲಿ ಈ ಹಸಿವನ್ನು ಕಳೆಯಬೇಕಿದೆ. ಹಸಿದ ಇಂದ್ರಿಯಗಳಿಗೆ ಕೆಟ್ಟದಾದ ಆಹಾರ ಸಿಕ್ಕಿತೆಂದರೆ ಮುಗಿಯಿತು. ಬದುಕು ಮೂರಾಬಟ್ಟೆಯಾಗಿಬಿಡುತ್ತದೆ. ಅದಕ್ಕಾಗಿಯೇ ಭಗವಂತನು ಚಿಂತಿಸಿ ಅಡಿಯಿಡಲೆಂದು ಚಿಂತಿಸುವ ಶಕ್ತಿಯನ್ನೂ , ಶ್ರೇಷ್ಠ ಜ್ಞಾನವನ್ನೂ ನಮಗೆ ದಯಪಾಲಿಸಿದ್ದಾನೆ. ನಾವು ಚಿಂತಿಸಬೇಕಷ್ಟೆ ! ಚಿಂತಿಸದೇ ಅಕಾರ್ಯಗಳನ್ನು ಗೈದರೆ ಆ ದೈವ ತಾನೆ ಏನು ಮಾಡುತ್ತಾನೆ !? ಅಲ್ಲವೇ ಗೆಳೆಯರೇ ?!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)