ಬಿಸಿಲಗುದುರೆಯಿದೇಳೊ

ಹೆಸರಿಗಾಗೆಳೆಸುವೇಕಮರರಾರಿಲ್ಲಿ ಪೇಳ್ !?
ಹೆಸರಿಗಾಗತ್ತವರು ಚಿರರಾದರೇನು !?
ಹೆಸರ ಕೆತ್ತಿಹನೇನು ಸೃಷ್ಟಿಸಿದ ದೇವ ತಾ
ಬಿಸಿಲಗುದುರೆಯಿದೇಳೊ ಜಾಣಮೂರ್ಖ //

ಹೊಟ್ಟೆ ಬಟ್ಟೆಗಾಗಿ ಅಖಂಡ ಜೀವರಾಶಿಯೇ ಪರಿತಪಿಸುತ್ತಿದೆ. ಅದಕ್ಕೇ ದಾಸವರೇಣ್ಯರಾದ ಕನಕದಾಸರು -ಎಲ್ಲರು ಮಾಡುವುದೂ ಹೊಟ್ಟೆಗಾಗೀ ಗೇಣು ಬಟ್ಟೆಗಾಗಿ ” ಎಂದು ವಿಡಂಬನೆಯಿಂದ ಹಾಡಿದ್ದಾರೆ. ಮತ್ತೆ ಕೆಲವರ ಹೋರಾಟ ಹೆಸರಿಗಾಗಿ ! ಹೆಸರಿಗಾಗಿ ಏನೆಲ್ಲಾ ಮಾಡುತ್ತಾರೆ !! ಮಾಡುವುದಕ್ಕೆ ಮಾಡೋದಿಲ್ಲ. ಕೆಲಸಕ್ಕೆ ಬಾರದುದಕ್ಕೆಲ್ಲಾ ಹೋರಾಟಗೈಯ್ಯುತ್ತಿರೋದು ಒಂದು ದೊಡ್ಡ ವಿಪರ್ಯಾಸವೇ ಸರಿ. ಹೋಗಲಿ ಹೆಸರಿಗಾಗಿ ದುಡಿದವರು ಯಾರು ಶಾಶ್ವತರಾಗಿ ಉಳಿದಿದ್ದಾರೆ ಇಲ್ಲಿ !? ನಮ್ಮದೇನು ಬಿಡಿ ! ಅಖಂಡ ಸೃಷ್ಟಿಯನ್ನ ಸೃಷ್ಟಿಸಿದ ಭಗವಂತನು ಎಲ್ಲಿ ಕೆತ್ತಿದ್ದಾನೆ ತನ್ನ ಹೆಸರನ್ನು !? ನಮ್ಮನ್ನು ಸೃಷ್ಟಿಸಿ , ಬದುಕ ನೀಡಿರುವ ಆ ದಿವ್ಯ ಭವ್ಯ ಶಕ್ತಿಗೆ ಋಣಿಯಾಗಿ ಕೃತಜ್ಞತೆಯಿಂದ ಬದುಕಿದಾಗ ಬದುಕು ಸಾರ್ಥಕ ಮತ್ತೆ ಅರ್ಥಪೂರ್ಣ. ಗ್ರಹ ತಾರೆ ನಕ್ಷತ್ರಗಳಾದಿಯಾಗಿ ಭವ್ಯ ಸೃಷ್ಟಿಯೇ ಒಂದು ದಿನ ಅಳಿದು ಹೋಗುವಾಗ ಇನ್ನು ನಮ್ಮ ಹೆಸರು ಉಳಿವುದೇನು !? ಇಂತಹುದೊಂದು ಅರಿವು ನಮ್ಮದಾಗಬೇಕಷ್ಟೆ. ಇನ್ನೆಲ್ಲಾ ಬಿಸಿಲುಗುದುರೆಯನರಸಿ ಹೋದಂತೆ ಅಷ್ಟೆ. ದೇವನೊಬ್ಬನೇ ಸತ್ಯ , ನಿತ್ಯ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)