ಮೆರೆಯಿತೋ ಕರುಣೆ

ಶ್ರುತ ಸೋಮಕಾದಿಗಳ ಕಡಿದನಶ್ವತ್ಥಾಮ
ಮೃತಶೋಕ ಮರೆಮಾಡಿ ಕ್ಷಮಿಸಿದಳು ಕೃಷ್ಣೆ !
ಹತಭಾಗ್ಯೆ ಪಾಂಚಾಲಿ ಮೆರೆಯೆ ತಾಯ್ಪ್ರೇಮ ಭಾ
ರತದಿ ಮೆರೆಯಿತೊ ಕರುಣೆ ಜಾಣಮೂರ್ಖ//

ಅಶ್ವತ್ಥಾಮ ಗುರುಪುತ್ರ. ಮಹಾ ಪರಾಕ್ರಮಶಾಲಿ. ಪಾಂಡವರೆಂದು ಭಾವಿಸಿ ಪಾಂಡವಸೂನುಗಳಾದ ಶ್ರುತಸೋಮಕ , ಪ್ರತಿವಿಂಧ್ಯ, ಶ್ರುತಕೀರ್ತಿ , ಶತಾನೀಕ ಹಾಗೂ ಶ್ರುತಸೇನರೆಂಬುವರನ್ನು ಸೇಡಿನಿಂದ ಕತ್ತರಿಸಿ ಹಾಕುತ್ತಾನೆ. ಇದು ಪಾಂಡವರಿಗೆ ತಿಳಿಯುತ್ತದೆ. ಕೋಪ ಜಾಜ್ವಲ್ಯಮಾನ ಪ್ರಕಾಶದಿಂದ ಸಿಡಿದೆದ್ದ ಅವರನ್ನು ತಾಯಿ ದ್ರೌಪದಿ ತಡೆಯುತ್ತಾಳೆ.ಅವಳ ಮಾತೃಹೃದಯ ಮಿಡಿಯುತ್ತದೆ. ಅಜ್ಞಾನದಿಂದ ಅಶ್ವತ್ಥಾಮ ಈ ಅಕಾರ್ಯ ಗೈದಿದ್ದಾನೆ. ನನ್ನ ಮಕ್ಕಳನ್ನು ಕಳೆದುಕೊಂಡು ಈ ತಾಯಿಹೃದಯ ಛಿದ್ರಗೊಂಡಿದೆ. ಆದರೆ ಇದಕ್ಕಾಗಿ ಅಶ್ವತ್ಥಾಮನನ್ನು ಕೊಂದರೆ ಸತ್ತ ನನ್ನ ಮಕ್ಕಳು ಹಿಂದಿರುಗಿ ಬರುವುದಿಲ್ಲ. ನಾಪಟ್ಟ ವೇದನೆ ಅವನ ತಾಯಿಯೂ ಅನುಭವಿಸುವುದು ಬೇಡ. ಅವನನ್ನು ಕ್ಷಮಿಸಿಬಿಡಿ ಎನ್ನುತ್ತಾಳೆ ಆ ತಾಯಿ. ಎಂತಹಾ ಕ್ಷಮಾಗುಣ ! ಎಂತಹಾ ಕರುಣೆ ! ಇದೇ ನಮ್ಮ ಭಾರತದ ಮಣ್ಣಿನ ಗುಣ , ಮಾತೆಯರ ಆದರ್ಶ. ಅದಕ್ಕೇ ನಮ್ಮ ಸನಾತನಧರ್ಮ , ಸಂಸ್ಕೃತಿ ಇಂದಿಗೂ ಚಿರ ನೂತನ ! ಚಿರ ಚೇತನ! ಅದು ಎಂದೆಂದಿಗೂ ಅಮರ!! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)