ಮಡಕೆ ತಾನೊಡೆದೊಡೇನೊಡೆವುದೇನೈ ಮಣ್ಣು !
ಕಡವರವು ಬೆಂದೊಡೇನಳಿವುದೇಂ ಚಿನ್ನ !
ಒಡಲಳಿದೊಡೇನಂತೆ ಕುಂದುವುದೆ ಆತ್ಮತಾ
ಮೃಡತತ್ತ್ವವಿಂತೆ ತಿಳಿ ಜಾಣಮೂರ್ಖ //
ಮಣ್ಣಿನ ಮಡಕೆ ಒಡೆಯುತ್ತದೆ. ಆದರೆ ಮಣ್ಣು ! ಮಡಕೆ ನಿಜವಲ್ಲ. ಆದರೆ ಮಣ್ಣು ನಿಜ ! ನಮ್ಮ ಭಾವಕ್ಕೆ ತಕ್ಕಂತೆ ಅದನ್ನು ರೂಪಿಸಿರುತ್ತೇವಷ್ಟೆ. ನಿಜವಾದುದಕ್ಕೆ ಅಳಿವೆಂತು !? ಅದು ಶಾಶ್ವತ ಹಾಗೇನೇ ಚಿನ್ನ . ಅಗ್ಗಿಷ್ಟಿಕೆಯಲ್ಲಿ ಅದು ನೊಂದು ಬೆಂದರೂ ಸಹ ನಾಶವಾಗದು. ರೂಪು ಹೋಗುತ್ತೆ.ಆದರೆ ಚಿನ್ನ ! ಅದಕ್ಕೇನೂ ನಷ್ಟವಿಲ್ಲ. ಅಂತೆಯೇ ಅದರ ಹೊಳೆಯುವ ಗುಣವೂ ನಾಶವಾಗದು ! ಹಾಗೆಯೇ ಈ ಆತ್ಮತತ್ತ್ವ ಕೂಡ . ಸಾವು ಶರೀರಕ್ಕೆ ಹೊರತು ಆತ್ಮಕ್ಕಲ್ಲ ! ಅಂತೆಯೇ ಶಿವತತ್ತ್ವ. ಇಡೀ ಬ್ರಹ್ಮಾಂಡವೇ ನಾಶವಾದರೂ ಆದಿ ಅಂತ್ಯಗಳಿರದ ಎಡೆಯಿರದ , ಕಡೆಯಿರದ ದಿವ್ಯಶಕ್ತಿ ! ಶಿವ. ಅಣುರೇಣುತೃಣಕಾಷ್ಟಗಳಲ್ಲಿ ಪರಿಪೂರ್ಣನಾಗಿರುವವನವನು. ಆ ಶಿವನಿಗೆ ಶಿವನೇ ಸಾಟಿ. ಆ ದಿವ್ಯಾನಂದ ತತ್ತ್ವಕ್ಕೆ ಶರಣಾಗಿ , ಆರಾಧಿಸುತ್ತಾ ಬದುಕುವುದಷ್ಟೇ ನಮ್ಮ ಕೆಲಸ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
