ಸಿದ್ಧಾಂತ- ಸಿದ್ಧಿ

ಸಿದ್ಧಾಂತ ಗೆದ್ದೊಡೇಂ ಬದುಕೆಡವಿ ಬಿದ್ದಿರಲು!
ಬದ್ಧತೆಯದೊದ್ದಾಡಿ ತಿಣುಕುತಿರಲು !
ಉದ್ಧಾಮ ಪಾಂಡಿತ್ಯ ನಿದ್ದೆಗೈಯ್ಯುತಲಿರಲು
ಸಿದ್ಧಿಯೆಂತೊದಗುವುದೊ ಜಾಣಮೂರ್ಖ//

ಇದು ಇಂದಿನ ಸ್ಥಿತಿಯ ಅನಾವರಣ ಎಂದರೆ ತಪ್ಪಾಗಲಾರದು. ಸೈದ್ಧಾಂತಿಕವಾಗಿ ಎಲ್ಲವನ್ನೂ ಓದುತ್ತಾರೆ ! ಅಂಕವೂ ಬರುತ್ತದೆ ! ಕೆಲಸವೂ ಸಿಗುತ್ತದೆ ! ಆದರೆ ಕಲಿತುದರ ಅರ್ಥಾತ್ ಪುಸ್ತಕಜ್ಞಾನದ ಅನುಷ್ಠಾನವಾಗಬೇಕಲ್ಲಾ ! ಏನೇ ಸೈದ್ಧಾಂತಿಕ ಜ್ಞಾನವಿದ್ದರೂ ಅದು ಬದುಕು ಕಲಿಸೋ ಪ್ರಾಯೋಗಿಕ ಪಾಠಕ್ಕಿಂತ ಮಿಗಿಲಾಗಲಾರದು. ಅನುಭವದ ಜ್ಞಾನವೇ ಶ್ರೇಷ್ಠ. ಹಾಗೆಂದು ಸಿದ್ಧಾಂತವನ್ನು ಜರಿಯುತ್ತಿಲ್ಲ ! ಕಲಿತದ್ದನ್ನು ಬದುಕಿನ ಅನುಭವದೊಂದಿಗೆ ಸಮನ್ವಯಿಸಿ, ತಾಳೆ ನೋಡುವ ಪ್ರವೃತ್ತಿ ಬಂದಾಗ ಅದು ಸಾರ್ಥಕವಾಗುತ್ತದೆ. ಆ ಕಾರ್ಯವಾಗದೆ ಇದ್ದರೆ ಬದುಕಿನಲ್ಲಿ ಬದ್ಧತೆ ಹೇಗೆ ಬರುತ್ತದೆ !? ಉದ್ಧಾಮ ಪಾಂಡಿತ್ಯದ ಸೋಗು ಹಾಕುವಿಕೆ ಎದ್ದು ಕಾಣುತ್ತದೆಯೇ ಹೊರತು ಪಾಂಡಿತ್ಯವು ಮಾತ್ರ ನಿದ್ರೆಗಯ್ಯುತ್ತಿರುತ್ತದೆ. ಹೀಗಾದರೆ ಯಶಸ್ಸು ಬರುವುದಾದರೂ ಹೇಗೆ !? ಅಂದುಕೊಂಡ ಗುರಿ ಮುಟ್ಟುವುದಾದರೂ ಹೇಗೆ !? ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)