ದೇವನೆಂದರೆ !

ದೇವನೆಂದರೆ ಶಾಂತಿ ದೇವನೆಂದರೆ ಪ್ರೀತಿ
ದೇವನೇ ಬೆಳಕಂತೆ ದೇವನೇ ಕಾಂತಿ
ದೇವಗುರು ದೇವನರಿವೆಲ್ಲವೂ
ದೇವನೈ
ದೇವಸರ್ವಸ್ವವರಿ ಜಾಣಮೂರ್ಖ//

ದೇವರನ್ನು ಎಲ್ಲೆಲ್ಲೋ ಹುಡುಕುತ್ತೇವೆ. ಮನಸ್ಸಿನಲ್ಲಿ ಶಾಂತಿ ಇರುತ್ತದೆಯಲ್ಲಾ ! ಅದೇ ದೇವರು ! ನಿಮ್ಮಿಂದ ಒಬ್ಬರಿಗೆ ಶಾಂತಿ ಸಮಾಧಾನಗಳು ಸಿಕ್ಕಿದರೆ ನೀವೇ ಅವರ ಪಾಲಿಗೆ ದೇವರಾಗಿಬಿಡುತ್ತೀರಿ. ಹಾಗೇ ಇಡೀ ಜಗತ್ತನ್ನೇ ಪ್ರೀತಿಯಿಂದ ಕಾಣಿ ! ಜಗತ್ತೇ ನಿಮ್ಮೊಡನೆ ಬರುತ್ತದೆ ! ಅದರಿಂದ ಸಿಗುವ ಆನಂದ ಬಣ್ಣಿಸಲು ಅಸದಳ ! ದೇವನೇ ಬೆಳಕು ! ಅವನೇ ಕಾಂತಿ ! ದೀಪ್ತಿ ! ದಾರಿತೋರುವ ಗುರುವೇ ದೇವರು ! ಗೆಲುವೇ ದೇವರು ! ಅರಿವೇ ದೇವರು ! ಪ್ರಪಂಚದಲ್ಲಿನ ಚರಾಚರ ವಸ್ತುಗಳೆಲ್ಲವೂ ದೇವನ ಪ್ರತಿರೂಪವೇ ಆಗಿದೆ . ಹಾಗೆ ನೋಡಿದರೆ ಸರ್ವಸ್ವವೂ ದೇವನೇ ಆಗಿರುವಾಗ ಅವನನ್ನು ಹುಡುವುದಾದರೂ ಏಕೆ !? ಈ ಅರಿವು ಮುಪ್ಪುರಿಗೊಂಡ ವ್ಯಕ್ತಿಯಲ್ಲಿ ಬ್ರಹ್ಮನ ಅರಿವಾಗಿ ಸ್ವಯಂ ದೇವನಾಗಿಬಿಡುತ್ತಾನೆ ! -“ಎಲ್ಲೋ ಹುಡುಕಿದೆ ಇಲ್ಲದ ದೇವರ ಕಲ್ಲು ಮಣ್ಣುಗಳ ಗುಡಿಯೊಳಗೇ , ಇಲ್ಲೇ ಇರುವ ಪ್ರೀತಿ ಸ್ನೇಹಗಳ ಗುರುತಿಸದಾದೆನು ನಮ್ಮೊಳಗೆ” ಎಂದಿರುವ ಕವಿವಾಣಿ ಅದೆಷ್ಟು ಸತ್ಯ ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)