ಕಿರಿದರಾ ಹಿರಿತತ್ತ್ವ

ಕಿರಿದಹುದು ಮರಳಕಣ ಕಟ್ಟಡವು ಕಿರಿದೇನು?!
ಕಿರಿದಾದುದೀವ ಸಿರಿಭಾವ ಬಲು ಹಿರಿದು !
ಕಿರಿದರಾ ಹಿರಿತತ್ತ್ವವರಿತಾಗ ಬಾಳ್ಗೆ ಜಸ
ಹಿರಿದೇನು ಕಿರಿದೇನು ಜಾಣಮೂರ್ಖ //

ಸಣ್ಣ ಕಣ ಅಂತ ಮರಳ ಕಣವನ್ನಾಗಲಿ ನಿಕೃಷ್ಟವಾಗಿ ಕಾಣಬಾರದು ಕಣಯ್ಯ ಗೆಳೆಯ ! ಅಂತಹಾ ಸಹಸ್ರ ಸಹಸ್ರ ಕೋಟಿ ಮರಳಕಣಗಳು ಸೇರಿಯೇ ನಮಗೆ ಮನೆಯಾಗಿ ಆಶ್ರಯ ಕೊಟ್ಟಿರೋದು ಅಲ್ಲವೇ !? ನಾವು ಯಾವುದನ್ನು ಕಿರಿದೆಂದು ಗಣಿಸುವುದಿಲ್ಲವೋ ಅದರಲ್ಲಿನ ಹಿರಿತತ್ತ್ವವು ಕೊಡುವ ಆನಂದವು ಮಾತ್ರ ತುಂಬಾ ದೊಡ್ಡದು ! ಅದನ್ನು ಗಮನಿಸಿ ಅರಿತು ಅನುಭವಿಸಬೇಕಷ್ಟೆ. ಆ ಕಿರಿದರಲ್ಲಿನ ಹಿರಿಯ ತತ್ತ್ವದಿಂದ ಬದುಕಿಗೊಂದು ಯಶಸ್ಸಿನ ದಾರಿ, ಒಂದು ಸಂದೇಶ ಖಂಡಿತ ಸಿಗುತ್ತದೆ. ಒಂದು ಬೆಂಕಿಕಡ್ಡಿ ತುಂಬಾ ಚಿಕ್ಕದು ಕನಿಷ್ಠ ಎನ್ನಬೇಡಿ. ಅದಿಲ್ಲದಿದ್ದರೆ ಮನೆಯ ದೇವರ ನಂದಾದೀಪ ಬೆಳಗದು ! ಗಂಧದಕಡ್ಡಿ ಚಿಕ್ಕದಿರಬಹುದು. ಆದರೆ ಅದು ತಾನು ತನ್ನನ್ನು ಸುಟ್ಟುಕೊಂಡು ಮನೆಯನ್ನೆಲ್ಲಾ ಸುಗಂಧದಿಂದ ತುಂಬಿಬಿಡುತ್ತದೆ! ಮತ್ತೆ ಅದು ಚಿಕ್ಕದೆಂತಾದೀತು !? ಕವಿತೆ ಚಿಕ್ಕದಿರಬಹುದು ಆದರೆ ಅದು ನೀಡುವ ಸಂದೇಶ ಚಿಕ್ಕದೇನು !? ಹಾಗೆ ನೋಡಿದರೆ ಇಲ್ಲಿ ಯಾವುದೂ ಕಿರಿದೂ ಅಲ್ಲ , ಯಾವುದೂ ಹಿರಿದೂ ಅಲ್ಲ. ಜಗತ್ಕಾರಣ ಕರ್ತ ಭಗವಂತನೊಬ್ಬನೇ ಮಹೋನ್ನತ ಸತ್ಯ ! ನಿತ್ಯ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)