ಸಣ್ಣದೀ ಹೃದಯ ಮಿಗೆ ಮಿಡಿಯುವಿಕೆ ಸಣ್ಣದೇ ?
ಸಣ್ಣದೀ ಮಸ್ತಷ್ಕ ತರ್ಕವದು ಕಿರಿದೆ ?
ಕಣ್ಣತೆರೆದೊಮ್ಮೆ ಕಾಣ್ ಹೃದಯದಿಂ ಚಿಂತಿಸೈ
ಸಣ್ಣದಲ್ಲವೊ ಬದುಕು ಜಾಣಮೂರ್ಖ //
ನಮ್ಮ ಹೃದಯವೇನೋ ಗಾತ್ರದಲ್ಲಿ ಸಣ್ಣದಿರಬಹುದು. ಆದರೆ ಅದರ ಮಿಡಿಯುವಿಕೆ ದೈವಸದೃಶವಾದುದು. ಹಾಗೇನೇ ಮೆದುಳೂ ಕೂಡ ಸಣ್ಣದೇ ಇರಬಹುದು. ಆದರೆ ಅದರ ವಿಮರ್ಶೆ , ತರ್ಕಗಳು ಸಣ್ಣವೇನು !? ಓ ಗೆಳೆಯ ಒಮ್ಮೆ ಕಣ್ಣತೆರೆದು ನೋಡು . ಬುದ್ಧಿಯಿಂದ ತರ್ಕಿಸಬೇಕೇನೋ ನಿಜ. ಆದರೆ ಎಲ್ಲವನ್ನೂ ಬುದ್ಧಿಯಿಂದಲೇ ತರ್ಕಿಸಿದರೆ ಸಂಬಂಧಗಳು ಉಳಿಯುತ್ತವೆಯೇ !? ಹಣ , ಆಸ್ತಿ ಎಲ್ಲವೂ ಕಳೆಯುವಂತಹವು ಆದರೆ ಬದುಕು ! ಈ ಬದುಕು ಬಹಳವೇ ದೊಡ್ಡದು. ಸಾವಿನಾಚೆಯ ಬದುಕು ಬೇರೆ ಇದೆ ಅಂತ ಪ್ರಾಜ್ಞರು ಹೇಳುತ್ತಾರೆ. ಆ ಬದುಕನ್ನು ಕಟ್ಟಿಕೊಳ್ಳಲು ಇಂದಿನ ನಮ್ಮ ಬದುಕು ನ್ಯಾಯಸಮ್ಮತವಾಗಿರಬೇಕಲ್ಲವೆ !? ಸತ್ಕರ್ಮ , ಸಚ್ಚಿಂತನೆ , ಸದ್ಧರ್ಮಿಯಾಗಿದ್ದುಕೊಂಡು ಮುಕ್ತಿಮಾರ್ಗದ ಸೋಪಾನವೇರಬೇಕು. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
