ತೃಪ್ತಿನೀಡದ ಸಿರಿಯದೆಂತ ಸಿರಿ ಪೇಳ್ ಕೆಳೆಯ
ತಪ್ತವಾಗಿಸುತೆದೆಯ ಒಳಗೆ ಬಡತನವೆ !?
ಸಪ್ತಖಂಡವನಾಳೆ ಖನ್ನತೆಯ ದೊರೆಯಾಗಿ !
ಗುಪ್ತವಾಗಿಸಲೇನೊ ಜಾಣಮೂರ್ಖ //
ಕೆಲವರಿಗೆ ತುಂಬ ಐಶ್ವರ್ಯ ಇರುತ್ತೆ. ಅವರು ಜಗತ್ತಿನ ಕಣ್ಣಿಗೆ ತುಂಬಾ ಶ್ರೀಮಂತರು. ಒಳಗೆ ಬಡವರು. ಹೃದಯ ಬರಿದಾಗಿರುತ್ತದೆ. ಎಷ್ಟು ಸಿರಿಯಿದ್ದರೇನು ? ನಾಯ್ಮೊಲೆಯ ಹಾಲು !! ಸಪ್ತದ್ವೀಪ ವಸುಂಧರೆಗೇ ಪ್ರಭುಗಳಾಗಿ ಮೆರೆದವರಾರೂ ನೆಮ್ಮದಿಯಿಂದ ಇದ್ದವರಲ್ಲ ! ಮನದ ಖಿನ್ನತೆಯೊಳಗೆ ನರಳಿದವರೇ ! ಒಳಗದನ್ನು ಅದುಮಿಟ್ಟು ಮೇಲೆ ಸಂತಸದ ಮುಖವಾಡ ಹಾಕಿದವರೇ ! ಇಂದಾಗುತ್ತಿರುವುದೂ ಅದೇ ತಾನೆ !? ನಮ್ಮ ಆಂತರ್ಯದಲ್ಲಿ ಮೂರ್ಛಾವಸ್ಥೆಯಲ್ಲಿರುವ ನೆಮ್ಮದಿಯ ನೆಲೆಯ ಕಡೆ ಸ್ವಲ್ಪ ಶಾಂತವಾಗಿ ದಿಟ್ಟಿ ಬೀರಿ ! ಅಲ್ಲಿ ಭಗವಂತನಿದ್ದಾನೆ ! ಶಾಂತವಾಗಿಯೇ ಅವನೊಡನೆ ಸೇರಿ ಶಾಂತತೆಯೇ ನಾವಾಗಿಬಿಡಬೇಕು. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
