ನವನೀತಮೀ ಬದುಕು ಸವಿವ ಸಹೃದಯಂಗೆ
ಭವದಿ ಬವಣಿಪಗಿದುವೆ ಬಿಡಿಸದಾ ಗಂಟು
ಸವಿದು ಬದುಕೇ ತಾನುಮೆಂದು ಭಾವಿಪ ಭವಿಗೆ
ಅವಲೀಲೆ ಶಿವಲೀಲೆ ಜಾಣಮೂರ್ಖ //
ಬದುಕನ್ನು ಸವಿಯಬೇಕಲ್ಲದೇ ಇದನ್ನೇ ಬಲೆಯಾಗಿಸಿಕೊಂಡು ಸಿಕ್ಕಿ ತೊಳಲಾಡಬಾರದು. ಹಾಗೆ ಸವಿವ ಸಹೃದಯನಿಗೆ ಬದುಕು ನವನೀತವಿದ್ದಂತೆ ! ಅಂಟಿಕೊಂಡು ಆದರೆ ಅಂಟದಂತೆ ಸುಖದಿಂದಿದ್ದರೆ ಅದರ ಸವಿಯ ಮಾತೇ ಬೇರೆ ! ಅಂಟಿಕೊಂಡು ಮುಳಗಿದವಗೆ ಇದು ಕಗ್ಗಂಟು ! ಇನ್ನು ಬದುಕೇ ತಾನು , ತಾನೇ ಬದುಕು ಎಂಬ ಭಾವದಲ್ಲಿ ಬದುಕನ್ನು ಕಳೆಯುವವನಿಗಂತೂ ಇದು ಅತಿ ಸಹಜವಾಗಿಯೂ , ಭಗವಂತನ ಲೀಲಾ ವಿನೋದದಂತೆಯೂ ಗೋಚರಿಸಿ ಆನಂದದಿಂದ ಕಳೆಯುತ್ತಾರೆ. ಕೆಲವರ ಪಾಲಿಗಿದು ನೀರ ಮೇಲಣ ಗುಳ್ಳೆ ! ಕೆಲವರಿಗಿದು ಚಿರವೆಂಬ ಭಾವ ! ಕೆಲವರಂತೂ ಮರಣದಾಚೆಗೆ ಏನಿದೆಯೆಂಬ ಅನ್ವೇಷಕರು ! ಹೀಗೆ ! ನಾವು ಹೇಗೆ ಸ್ವೀಕಾರ ಮಾಡುತ್ತೇವೋ ಹಾಗೆ ! ಆದರೆ ವರ್ತಮಾನದಲ್ಲಿ ಸಂತೋಷದಿಂದ ಬದುಕುವುದಿದೆಯಲ್ಲಾ ಅದೇ ಬಹಳ ಸುಖವಾದ ಬದುಕು. ಅಲ್ಲವೇ ಗೆಳೆಯರೇ !
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
