ಕನವರಿಸದಿರು ಮತ್ತೆ

ದಿನದಿನವು ಉಂಡುಡಲು ಕೊಟ್ಟಿಲ್ಲವೇ ದೈವ
ಮನದಿ ಚಿಂತೆಯದೇಕೆ ಮತ್ತೇಕೆ ಮುನಿಸು !?
ಮನವ ಸುಡುತಿದೆ ಬಿಡದೆ ಚಿಂತೆಚಿತೆ ದಹಿಸಿಬಿಡು
ಕನವರಿಸದಿರು ಮತ್ತೆ ಜಾಣಮೂರ್ಖ //

ನಾವು ಬದುಕೋದಕ್ಕೆ ಎಷ್ಟು ಬೇಕೋ ಅಷ್ಟನ್ನು ಭಗವಂತ ಸಮೃದ್ಧವಾಗಿ ನೀಡಿದ್ದಾನೆ. ಉಣ್ಣಲು , ಉಡಲು ಯಾವ ಕೊರತೆಯೂ ಇಲ್ಲದಷ್ಟರ ಮಟ್ಟಿಗೆ ಕೊಟ್ಟು ಸವಿದು ಬದುಕಲು ಕಳುಹಿಸಿದ್ದಾನೆ. ಅದರೂ ಕಷ್ಟಪಡದೇ ಎಲ್ಲವೂ ಸಿಕ್ಕಿಬಿಡಬೇಕೆನ್ನುವ ಲೋಭದಲ್ಲಿ ನಾವು ಚಿಂತಿತರಾಗುತ್ತಿದ್ದೇವೆ. ಶಾಂತರಾಗಿ ಯೋಚಿಸಿ , ನಿಮಗೇ ತಿಳಿಯುತ್ತೆ. ನಮ್ಮಾಂತರ್ಯದಲ್ಲಿ ಚಿಂತೆಯೇ ಚಿತೆಯಾಗಿ ಸುಡುತ್ತಿದೆ ! ದಿನೇ ದಿನೇ ದಹಿಸುತ್ತಿದೆ ! ಅದರಿಂದ ನಾವೂ ಜರ್ಜರಿತರಾಗುತ್ತಿದ್ದೇವೆ. ಆದರೂ ಆ ಲೋಭದ ಕನವರಿಕೆ ಮಾತ್ರ ನಮ್ಮಿಂದ ದೂರವಾಗುತ್ತಲೇ ಇಲ್ಲ. ಈಗಂತೂ ಮಿತಿಮೀರಿ ಮತಿಗೆಟ್ಟಿದೆ ! ಗತಿಗೆಟ್ಟು ಹೋಗುವ ಮುನ್ನ ಎಚ್ಚರಾಗಬೇಕಿದೆ ! ನಮ್ಮ ಪ್ರೀತಿಯ ಹೆಮ್ಮೆಯ ಮುಕ್ತಕ ಭೀಷ್ಮ ಡಿ.ವಿ.ಗುಂಡಪ್ಪ ರವರು ಅದಕ್ಕೇ ನಮ್ಮನ್ನು ಕರೆದಿರೋದು “ಸಿಂಬಳದ ನೊಣನೀನು ಮಂಕುತಿಮ್ಮಾ !” ಎಂದು. ಆ ಸಾಲುಗಳನ್ನು ಓದಿ ಕ್ಷಣಕಾಲ ದಿವ್ಯ ವೈರಾಗ್ಯಕ್ಕೆ ಬೀಳುವ ಮನಸ್ಸು ಸ್ವಲ್ಪ ಕಾಲದಲ್ಲೇ ಮತ್ತೆ ಲೋಭಿಯಾಗುತ್ತದೆ !? ಏನಿದು ಇಂತಹಾ ಸೆಳೆತ !? ಈ ಬಲೆಯಿಂದ ಬಿಡಿಸಿಕೊಂಡು ಹೊರಬಂದು ಶಾಂತಿ ನೆಮ್ಮದಿಗಳಿಂದ ಸಂತೋಷವಾಗಿ ಬದುಕಿದರೆ ಅದು ಸಮೃದ್ಧವಾದ ಸುಂದರ ಬದುಕಾಗುತ್ತದೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)