ಬಲಿಯಾಯಿತೇಂ ಸತ್ಯ

ಬಿಲ್ಲುಗಾರನ ಬಲ್ಮೆ ಕಂಡು ದಂಗೇರಿ ತಾ
ಪಲುಗುಣಂಗೊದಗಿ ನಿಜ ಮಾನವತೆ ಮರೆತು
ಬಲಗಯ್ಯ ಹೆಬ್ಬೆರಳ ಬಲಿಯಾಗಿ ಪಡೆದೊಡೇಂ !
ಬಲಿಯಾಯಿತೇಂ ಸತ್ಯ ಜಾಣಮೂರ್ಖ //

ದ್ರೋಣಾಚಾರ್ಯರಂತಹಾ ಗುರುಗಳು ; ಏಕಲವ್ಯನಂತಹಾ ಶಿಷ್ಯ ಈ ಸೃಷ್ಟಿಯಲ್ಲಿ ಇಂತಹಾ ಗುರುಶಿಷ್ಯರು ಬಲು ಅಪೂರ್ವ ! ಆದರೆ ಏಕಲವ್ಯನು ಗುರುದ್ರೋಣರ ಮೂರ್ತಿಯನ್ನಿಟ್ಟುಕೊಂಡೇ ಸತತಾಭ್ಯಾಸದಿಂದ ಕಲಿತ ಶಬ್ದವೇದಿಯನ್ನು ಕಂಡು ದಂಗಾದರು ! ಅರ್ಜುನನನ್ನು ಮೀರಿಸಿದ ಬಿಲ್ಲುಗಾರನಾಗಿಬಿಟ್ಟನಲ್ಲ , ಅದೂ ತನ್ನ ಮೂರ್ತಿಯನ್ನಿಟ್ಟುಕೊಂಡು ! ಗುರು ದ್ರೋಣರಿಗೆ ಏಕಲವ್ಯನ ಬಗ್ಗೆ ಅಪಾರ ಹೆಮ್ಮೆ , ಗೌರವಾದರಗಳು ಮೂಡಿದವು. ಆದರೆ ಪಕ್ಕದಲ್ಲೇ ಇದ್ದ ಅರ್ಜುನನ ಕಣ್ಣು ಕೆಂಪಾಯ್ತು ! ಕೌರವ ಪಾಂಡವರಿಗಲ್ಲದೇ ಬೇರೆಯವರಿಗೆ ಧನುರ್ವಿದ್ಯೆಯನ್ನು ಕಲಿಸುವುದಿಲ್ಲವೆಂಬ ವಚನ ನೆನಪಿಗೆ ಬಂತು ! ಗುರುದಕ್ಷಿಣೆಯಾಗಿ ಬಲಗಯ್ಯ ಹೆಬ್ಬೆರಳನ್ನೇ ಪಡೆದುಬಿಟ್ಟರು ! ಆ ಶಿಷ್ಯನೂ ಸಂತೋಷವಾಗಿ ಕೊಟ್ಟು ಕೃತಾರ್ಥನಾದ ! ಆಮೇಲೆ ಹೃದಯ ಕರಗಿತು. ಆದರೇನು !? ಹೆಬ್ಬೆರಳ ಬಲಿಯಾಗಿ ಹೋಗಿತ್ತು ! ಆದರೆ ಸತ್ಯ ಬಲಿಯಾಗಿರಲಿಲ್ಲ. ದ್ವೇಷ , ಅಸೂಯೆ , ಮಾಯೆಗಳು ಅವರನ್ನೇ ಬಿಡಲಿಲ್ಲವಲ್ಲ ! ತನ್ನ ಕ್ರೌರ್ಯದ ವಿರಾಡ್ರೂಪವನ್ನು ತೋರಿಸಿಯೇ ಬಿಟ್ಟಿತ್ತು. ಹೆಮ್ಮೆಯ ಶಿಷ್ಯ ಏಕಲವ್ಯನು ಮಾತ್ರ ವೀರ , ಶೂರ , ಸದ್ಗುಣಸಾರನಾಗಿ, ಮಹಾ ಪರಾಕ್ರಮಿಯಾಗಿ ತಾನೆಂದಿಗೂ ಚಿರ ! ಅಮರ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)