ಏನು ಸಾಧನೆ ಮನದೊಳೇನು ಶೋಧನೆ ಜಗದಿ
ಏನೇನು ದಿಗ್ವಿಜಯವೆಲ್ಲೆಗಳ ದಾಟೆ !
ಏನಾದೊಡೇನೆಲ್ಲ ಕೊನೆಗೆ ಮೌನವೆ ಗತಿಯು
ನಾನತ್ವ ತೊರೆ ಮೊದಲು ಜಾಣಮೂರ್ಖ //
ಅಬ್ಬಾ , ಈ ಜಗತ್ತಿನಲ್ಲಾಗುತ್ತಿರೋ ಸರ್ವತೋಮುಖ ಬೆಳವಣಿಗೆಗಳನ್ನು ಗಮನಿಸಿದರೆ ಅಚ್ಚರಿಯಾಗುತ್ತದೆ. ಅದೆಂತೆಂತಹಾ ಸಂಶೋಧನೆಗಳು ! ಕ್ರಾಂತಿಗಳು ! ಎಂತೆಂತಹಾ ದಿಗ್ವಿಜಯಗಳು ! ಅಗ್ನಿದಿವ್ಯಗಳು ! ನಾಗದಿವ್ಯಗಳು ! ಅದರಲ್ಲೆಲ್ಲಾ ಗೆದ್ದು ಅಸ್ತಿತ್ವ ಸಾಧಿಸಿದ ಪರಿ ! ಬದುಕಿನ ಎಲ್ಲೆಯನ್ನು ದಾಟಿದಂತಹಾ ಬಗೆ !! ಎಲ್ಲಾ ಸರಿ , ಇವೆಲ್ಲಾ ಹೊರಗಿನ ಕ್ರಾಂತಿಯಾಯ್ತು ! ಆದರೆ ಆಂತರ್ಯದ ಕ್ರಾಂತಿಯೆಂತು !? ಏನು ಸಾಧನೆಗೈದರೇನು !! ಮೌನಕ್ಕೆ ಶರಣಾಗುವುದೇ ಕೊನೆ ! ಅದೇನೇ ಸಾಧನೆಯಾಗಿದ್ದರೂ ಪ್ರಕೃತಿಯ ಅನಂತತೆಯ ಎದುರಲ್ಲಿ ಚಿಕ್ಕದೇ ತಾನೇ ! ಈ ಅರಿವು ಮೂಡಿದಾಗ ಮೌನಕ್ಕೆ ಶರಣಾಗಿಬಿಡುವುದು. ಇದು ಸಾಧಕರ ಅಂತಿಮ ಸ್ಥಿತಿ ! ಮತ್ತೆ ನಾನತ್ವವಾದರೂ ಏಕೆ ? ಅಲ್ಲವೇ ಗೆಳೆಯರೇ ?!
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
