ನೊಂದವಗೆ ನೊಂದವನ ಬಂಧವಲ್ಲದೆ ಮತ್ತೆ
ಬಂದು ಹೋಗುವರೆಲ್ಲ ಬಂಧುವಾಗುವರೆ ?
ಕುಂದುಗಳನರಿತು ತಾ ಬಂಧುರದಿ ಬೆರೆವವರೆ
ಬಂಧುರದ ಬಂಧುಗಳೊ ಜಾಣಮೂರ್ಖ //
ಬದುಕಿನಲ್ಲಿ ನೊಂದು ಬೆಂದವರಿಗೆ ಮಾತ್ರ ನೊಂದವರ ನೋವು ಏನೆಂದು ತಿಳಿಯುವುದು. ನೊಂದವರು ಮಾತ್ರ ನೊಂದವರಿಗೆ ಸ್ಪಂದಿಸುವುದು. ಅವರೇ ನಿಜವಾದ ಬಂಧುಗಳು. ಬಾಕಿಯವರೆಲ್ಲ ಬಂದು ಹೋಗುವವರಷ್ಟೆ. ಅದರಲ್ಲೂ ಬದುಕಿನಾಳದ ನೋವುಗಳನ್ನು ಗುರುತಿಸಿ ಸ್ವಯಂ ನೆರವಿಗೆ ಬರುವವರು ಭಗವದ್ ಸ್ವರೂಪಿಗಳೇ ಆಗಿರುತ್ತಾರೆ. ಕಂಡೂ ಕಾಣದಂತೆ ಜಾಣಗಿವುಡು , ಜಾಣಕುರುಡು ಪ್ರದರ್ಶಿಸುವವರೇ ಈ ಕಲಿಗಾಲದಲ್ಲಿ ಹೆಚ್ಚು. ಹಾಗೆ ನೆರವಾಗುವವರು ಅತಿ ದುರ್ಲಭ. ಅಲ್ಲವೇ ಗೆಳೆಯರೇ !? ಹಾಗೆ ನೆರವಾಗುವವರು ತಮ್ಮ ಕಷ್ಟವನ್ನು ಪರಿಗಣಿಸುವುದೇ ಇಲ್ಲ. -” ಬೆಳಕಿಗೊಲಿದವರ್ ಉರಿವ ಬತ್ತಿಯ ಕರುಕ ಕಾಣರು ” ಎನ್ನುತ್ತಾರೆ ಕವಿ ಪು.ತಿ.ನರಸಿಂಹಾಚಾರ್ ರವರು ತಮ್ಮ ಶಬರಿ ಗೀತನಾಟಕದಲ್ಲಿ. ಅವರೇ ಭಗವಂತ ಕಳುಹಿಸಿದ ಬಂಧುಗಳಾಗಿರುತ್ತಾರೆ. ಅನುಭವಿಸಿದವರಿಗೆ ಮಾತ್ರ ಈ ಸ್ಥಿತಿಯ ಅನುಭವವಾಗಿರುತ್ತದೆ ಅಷ್ಟೆ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
