ಬಾಳ ಬಾವಿಯೊಳಿಳಿದು ತಿಳುವೆಂಬ ನೀರೆತ್ತ
ಲಾಳವಿಹುದಯ್ಯ ಬಲು ತಾಳಬೇಕಯ್ಯ !
ತಾಳಿಕೆಯೆ ತಪವು ಕಾಣ್ ಅರಿವ ನೀರೆತ್ತಿದರೆ
ಬಾಳೊಳಳಿಮನವೆಲ್ಲೊ ಜಾಣಮೂರ್ಖ //
ಈ ಬದುಕು ಒಂದು ದೊಡ್ಡ ಬಾವಿ. ತುಂಬ ಸಿಹಿಯಾದ ನೀರಿದೆ. ಆದರೆ ಅದು ತುಂಬಾ ಆಳದಲ್ಲಿದೆ ! ಬರೀ ನೀರಲ್ಲ ಅದು ! ತಿಳಿವೆಂಬ ನೀರು ! ತಾಳ್ಮೆ ಮತ್ತು ಎಚ್ಚರಿಕೆಯಿಂದ ಈ ಬಾಳ ಬಾವಿಯಲ್ಲಿಳಿದು ಆ ನೀರನ್ನು ತರಬೇಕು ಕಣಯ್ಯ ಗೆಳೆಯ. ತಾಳುವುದು ತಪಸ್ಸು. ತಾಳಿದವನು ಬಾಳಿಯಾನೆಂಬ ಮಾತು ಕೇಳಿಲ್ಲವೇ !? ಹಾಗೆ. ಆ ಅರಿವಿನ ಜಲ ಸಿಕ್ಕರೆ ಮುಗಿಯಿತು. ಬಾಳಿನಲ್ಲಿ ಈ ಚಂಚಲ ಮನಸ್ಸು ಸಂಸ್ಕಾರಗೊಳ್ಳುತ್ತದೆ. ಬದುಕು ಅರ್ಥಪೂರ್ಣವಾಗುತ್ತದೆ. ಅದಕ್ಕೆ ಅರಿವಿನ ಜಲ ಬೇಕು. ಕಷ್ಟವೇಕೆ !? ಗುರುವಿನ ಮೊರೆ ಹೋದರಾಯ್ತು ಮೊಗೆಮೊಗೆದು ಕೊಡುತ್ತಾರವರು. ಇದರಲ್ಲಿ ಸಂದೇಹವೇಕಯ್ಯಾ ಗೆಳೆಯಾ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
