ಧರ್ಮಸೂಕ್ಷ್ಮ – ಕರ್ಮಸೂಕ್ಷ್ಮ

ಬಿಲ್ಲಾಳು ಪಾರ್ಥಂಗೆ ಹರಿಯೊಲುಮೆಯಂತೆ ಮಿಗೆ
ಬಿಲ್ಲಾಳು ಕರ್ಣಂಗೆ ಹರಿಯ ಅವಕೃಪೆಯು
ಬಲ್ಲಿದನು ಕರ್ಣ ತಾ ಧರ್ಮಬಾಹಿರಕೊಲಿದ
ಸೊಲ್ಲೇಕೆ ವಿಧಿಯಾಟ ಜಾಣಮೂರ್ಖ //

ಕರ್ಮ ತಾ ಕರೆವಾಗ ಧರ್ಮ ನೋಡಲುಮೆಂತು !
ಧರ್ಮ ಪಕ್ಷವ ಪಿಡಿದ ಹರಿಗಂಗೆ ಹರಿಯು
ಧರ್ಮಪರನಿಗೆ ಸುಖವಧರ್ಮಪರನಿಗೆ ದುಃಖ
ಕರ್ಮಸಿದ್ಧಾಂತಮಿದು ಜಾಣಮೂರ್ಖ//

ಸ್ನೇಹಿತರೇ ಇಂದು ಎರಡು ಮುಕ್ತಕಗಳಿದ್ದು , ಎರಡೂ ಒಂದಕ್ಕೊಂದು ತುಂಬಾ ಪೂರಕ. ಈ ಎರಡು ಮುಕ್ತಕಗಳ ಉಲ್ಲೇಖವೂ ಅನಿವಾರ್ಯ ಎಂದು ತೋರಿತು. ಏಕೆಂದರೆ ಇದು ಧರ್ಮಸೂಕ್ಷ್ಮ ! ಕರ್ಮಸೂಕ್ಮವೂ ಹೌದು. ನಾವು ಕಲಿತದ್ದು ಏನೇ ವಿದ್ಯೆಯಾಗಿರಲಿ ಅದನ್ನು ಹೇಗೆ ಬಳಸಿಕೊಳ್ಳುತ್ತೇವೆ ಅನ್ನೋದು ತುಂಬಾ ಮುಖ್ಯ. ಈಗ ನೀವೇ ನೋಡಿ ಕರ್ಣ ಮತ್ತು ಅರ್ಜುನ ಇಬ್ಬರೂ ಸಹ ಅದ್ವಿತೀಯ ಬಿಲ್ಲುಗಾರರೇ ! ಆದರೂ ಧರ್ಮ ಪಕ್ಷವನ್ನು ಹಿಡಿದ ಅರ್ಜುನ ಶ್ರೀಕೃಷ್ಣನ ಕೃಪೆಗೆ , ಪ್ರೀತಿಗೆ ಪಾತ್ರನಾದ.ಆದರೆ ಕೌರವ ಪಕ್ಷದಲ್ಲಿದ್ದು ಅಧರ್ಮಪಕ್ಷದ ಪರವಾಗಿ ಇದ್ದುದರ ಫಲವಾಗಿ ಧರ್ಮನಿಷ್ಠನೇ ಆಗಿದ್ದರೂ ಸಹ ಕರ್ಣನು ಕೃಷ್ಣನ ಅವಕೃಪೆಗೆ ಪಾತ್ರನಾದ. ಸತ್ಯದ ಪರ , ಧರ್ಮದ ಪರ ಇದ್ದರೆ ಕಷ್ಟಗಳಿದ್ದರೂ ದೈವದ ಸೂಕ್ತ ಸಹಾಯ ಒದಗಿಬರುತ್ತದೆ. ಕೊನೆಯಲ್ಲಿ ಸುಖಾಂತ್ಯ ಕಟ್ಟಿಟ್ಟ ಬುತ್ತಿ. ಸತ್ಯದ ಪರವಿಲ್ಲದವರಿಗೆ ಸಧ್ಯಕ್ಕೆ ಸುಖವಿರಬಹುದಾದರೂ ಸುಖಾಂತ್ಯದ ಮಾತು ಹಾಗಿರಲಿ , ಕೊನೆಯವರೆಗೂ ನೆಮ್ಮದಿಯಿಲ್ಲದ , ಅಶಾಂತಿಯ ಬದುಕು!! ಆಯ್ಕೆ ಅವರವರಿಗೇ ಬಿಟ್ಟದ್ದು. ಧರ್ಮೋ ರಕ್ಷತಿ ರಕ್ಷಿತಃ ಯಾರು ಧರ್ಮವನ್ನು ರಕ್ಷಿಸುವನೋ ಅವನನ್ನು ಧರ್ಮವೂ ರಕ್ಷಿಸುತ್ತದೆ. ಅದೆಷ್ಟು ಸತ್ಯವೀ ಮಾತು ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)