ರವಿವಾರವೆನ್ನುತಲಿ ರಜೆ ಹಾಕುವನೆ ರವಿಯು !?
ಕವಿಯುತೆನ್ನುತಲಿರುಳು ಕಾಲ ನಿಲ್ಲುವುದೆ !?
ಭವದ ಭಾರಕೆ ಸೋತು ವಿಶ್ರಮಿಪುದೇ ಹೃದಯ !
ಭವದಿ ಬದುಕೇ ದೈವ ಜಾಣಮೂರ್ಖ //
ಎನೋ ಒಂದೊಂದು ಸಾರಿ ಇಂತಹಾ ಚಿಂತನೆಗಳು ಮನದಿ ಸುಳಿದಾಗ ಎಷ್ಟು ವಿಸ್ಮಯ ಈ ಬದುಕು ಅನ್ನಿಸುತ್ತೆ. ಭಾನುವಾರ ನನಗೂ ವಿಶ್ರಾಂತಿ ಬೇಕು ಅಂತ ಸೂರ್ಯ ಬಾರದೇ ಇರುವನೇನು ? ರಾತ್ರಿಯಾಯಿತು , ಕತ್ತಲಾವರಿಸಿತು ಅಂತ ಕಾಲ ನಿಲ್ಲುತ್ತದೇನು !? ಅಬ್ಬಾ ! ಈ ಭವದ ಚಿಂತೆಗಳಲ್ಲಿ ಬಸವಳಿದೆನೆಂದು ಹೃದಯದ ಬಡಿತ ನಿಂತು ಬಿಡುವುದೇನು !? ಇಲ್ಲ ತಾನೆ ? ಸೂರ್ಯದೇವನಾಗಲಿ , ಕಾಲವಾಗಲಿ , ಹೃದಯವಾಗಲಿ ಅದೆಂತಹಾ ಕರ್ತವ್ಯಪರರು ! ಈ ಬದುಕಿನಲ್ಲಿ ಕರ್ತವ್ಯವೇ ದೇವರು. ಕಾಯಕವೇ ಕೈಲಾಸ ! ಆ ಕರ್ತವ್ಯವೇ ಬಾಳಿನ ಉಸಿರಾಗಬೇಕು. ಒಬ್ಬರು ತತ್ತ್ವಜ್ಞಾನಿಗಳು ಹೇಳೋದೇನೆಂದರೆ -” ದೇವರು ಎಂದಿಗೂ ನಾಮಪದವಲ್ಲ!ದೇವನೆಂದರೆ ಕ್ರಿಯಾಪದ ” ( God is not a noun , God is a verb) ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
