ಬಾಳಿನೀ ನಾಟಕದಿ ವಿಧಿಯ ಗಾಳವದೆಂತೊ
ಧಾಳಿ ಗೈದೆಳೆವುದೈ ಮರುಳ ಮಾಡುವುದೊ !
ಧೂಳಾಗಿಪುದೊ ಬಾಳು ದಾಳವಾಗದಿರಯ್ಯ
ಏಳು ಎಚ್ಚರನಾಗೊ ಜಾಣಮೂರ್ಖ //
ಈ ಬಾಳ ನಾಟಕದಲ್ಲಿ ವಿಧಿವಿಲಾಸವನ್ನು ಅರಿತವರು ಯಾರು ! ಅದು ಯಾರಿಗೆ ಹೇಗೆ ಗಾಳ ಹಾಕುತ್ತದೆಯೋ ಬಲ್ಲವರಾರು !? ಧಾಳಿ ಮಾಡಿ ಬಿಡುತ್ತದೆ. ಅದರ ಧಾಳಿಗೆ ಮರುಳಾಗದವರೇ ಇಲ್ಲ. ಬದುಕೇ ಧೂಳೀಪಟವಾಗಿಬಿಡುತ್ತದೆ. ಅದರಿಂದ ನಾವು ಹೇಗಿರಬೇಕೆಂದರೆ ಹೆಜ್ಜೆ ಹೆಜ್ಜೆಗೆ ಎಚ್ಚರವಾಗಿರಬೇಕು. ಬದುಕಿನ ಲೌಕಿಕ ಉಪಾದಿಗಳ ಸೆಳೆತಕ್ಕೆ ಸಿಲುಕಬಾರದು. ಸಿಲುಕಿದರೂ ಮಿತಿಯಲ್ಲಿರಬೇಕು. ಮಿತಿಮೀರಿದರೆ , ಅತಿಯಾಸೆ ಪಟ್ಟರೆ ಗತಿಕೇಡು ! ಈ ಸತ್ಯವನ್ನರಿತು ಎಚ್ಚರದಿಂದ ಮುಂದಡಿಯಿಡಬೇಕು. ನಮ್ಮ ಬದುಕಿನ ಪರಿಯನ್ನು ಕಂಡು ವಿಧಿಯೇ ತಬ್ಬಿಬ್ಬಾಗುವಂತಿರಬೇಕು ನಮ್ಮ ಬದುಕು ! ಅದಕ್ಕೆ ಕಷ್ಟ ಪಡಬೇಕಿಲ್ಲ ! ಸತ್ಯ , ಋಜುತ್ವ , ಧ್ಯಾನ , ಮನೋನಿಗ್ರಹ ಮೊದಲಾದ ಮೌಲ್ಯಗಳನ್ನು ಅಳವಡಿಸಿಕೊಂಡು ಬದುಕಬೇಕಷ್ಟೆ ! ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
