ಒಬ್ಬಗೆಲ್ಲವ ಹೊರಿಸೆ

ಕಬ್ಬು ಸಿಹಿಯೆಂದು ಬಲು ಜಗಿಜಗಿದು ಹೀರಲೇಂ
ಹಬ್ಬದೊಳ್ಮಿತಿ ಮೀರುತೊಬ್ಬಟ್ಟ ತಿನಲೇನು
ಕಬ್ಬು ಗಬ್ಬಂತೆ ಮೇಣ್ ಹಬ್ಬವುಬ್ಬರಮಂತೆ
ಒಬ್ಬಗೆಲ್ಲವ ಹೊರಿಸೆ ಜಾಣಮೂರ್ಖ //

ಕಬ್ಬು ಸಿಹಿಯೆಂದು ಸಿಕ್ಕಾಪಟ್ಟೆ ಜಗಿಜಗಿದು ಹೀರಿದರೆ ಒಂದು ಹಂತದಲ್ಲಿ ಅದು ತನ್ನ ಸಿಹಿ ಕಳೆದುಕೊಂಡು ಸಪ್ಪೆಯಾಗುತ್ತದೆ ಅಲ್ಲವೇ !? ಹಾಗೆಯೇ ಒಬ್ಬಟ್ಟು ಇಷ್ಟವೆಂದು ಒಬ್ಬಟ್ಟನ್ನು ಮಿತಿಮೀರಿ ತಿಂದರೆ ಹೊಟ್ಟೆ ಉಬ್ಬರ , ನೋವುಗಳಿಗೆ ಈಡಾಗಬೇಕಾಗುತ್ತದೆ ಅಷ್ಟೆ. ಇವುಗಳು ಹೇಗೋ ಹಾಗೆ ಒಬ್ಬ ವ್ಯಕ್ತಿ ಇವನು ಕಾರ್ಯವೆಸಗುತ್ತಾನೆ ಅಂತ ಎಲ್ಲವನ್ನೂ ಒಬ್ಬನ ಮೇಲೇ ಹೊರಿಸಿದರೆ ಅವನೂ ತನ್ನ ಆಸಕ್ತಿ , ಸೃಜನಶೀಲತೆಗಳನ್ನು ಕಳೆದುಕೊಳ್ಳುತ್ತನಷ್ಟೆ. ಅಲ್ಲವೇ !? ಇದನ್ನು ಪ್ರತಿಯೊಬ್ಬರೂ ಅರಿತುಕೊಳ್ಳಬೇಕು. ಅರಿತು ನಡೆದಾಗ ಬದುಕು ಸುಂದರ. ಇಲ್ಲದಿದ್ದರೆ ಕಬ್ಬು ಗಬ್ಬು ಎನಿಸುವಂತೆಯೂ , ಒಬ್ಬಟ್ಟು ಹೊಟ್ಟೆಯುಬ್ಬರಕ್ಕೆ ಕಾರಣವಾದಂತೆಯೂ ಬದುಕಾಗುತ್ತದೆ. ಯಾವುದೂ ಅತಿಯಾಗಬಾರದು. ಅತಿಯಾದರೆ ಋಣಾತ್ಮಕವಾಗಿ ಪರಿಣಮಿಸುತ್ತದೆ. ಆದರೆ ಅತಿಯಾದಷ್ಟೂ ಸಂತೋಷವನ್ನು ಕೊಡುವುದು ಭಗವಂತನ ನಾಮಸ್ಮರಣೆ ಮಾತ್ರ ! ಇದು ಅನುಭವಿಸುವವರಿಗೆ ಮಾತ್ರ ವೇದ್ಯವಾಗುತ್ತದೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)