ಕಪ್ಪೆ ನಿನ್ನಾತ್ಮ !

ಕಪ್ಪೇನು ಬಿಳುಪೇನು ಸರ್ವ ಸುಂದರವಿಲ್ಲಿ
ಒಪ್ಪು ಜಗದೊಳಗೆಲ್ಲ ತನ್ನ ತನ್ನಂತೆ
ಒಪ್ಪಗೈದವನ ಕಾಣ್ ಬೆಪ್ಪನಂತಾಡದಿರು
ಕಪ್ಪೆ ನಿನ್ನಾತ್ಮ ಪೇಳ್ ಜಾಣಮೂರ್ಖ//

ಸ್ನೇಹಿತರೇ , ಹಾಗೇ ಈ ಜಗತ್ತನ್ನು ಗಮನಿಸಿ ಈ ಸೃಷ್ಟಿಯಲ್ಲಿ ಯಾವುದೂ ಕುರೂಪವೂ ಅಲ್ಲ , ಸುರೂಪವೂ ಅಲ್ಲ. ಅದೆಲ್ಲಾ ನಾವು ಮಾಡಿಕೊಂಡಿರೋದಷ್ಟೆ. ಕಪ್ಪು , ಬಿಳುಪು ಹೀಗೇ ಏನೇನೋ ತರತಮ ಭಾವನೆಗಳಿವೆಯಲ್ಲ ಇವೆಲ್ಲಾ ಸೃಷ್ಟಿಯಾದದ್ದು ಮನುಷ್ಯನಿಂದಷ್ಟೆ ! ಓ ಗೆಳೆಯಾ ನೀನು ಯಾವುದನ್ನು ಪ್ರೇಮದಿಂದ ನೋಡುವೆಯೋ ಅದು ಸುಂದರವಾಗಿ ಕಾಣುತ್ತದೆ. ನಿಮ್ಮ ಭಾವವು ನೋಡುವ ವಸ್ತುವನ್ನು ಮತ್ತಷ್ಟು ಸುಂದರವಾಗಿಸುತ್ತೆ ಅಷ್ಟೆ. ಈ ಸಮಸ್ತ ಸುಂದರ ಸೃಷ್ಟಿಯನ್ನುಸೃಷ್ಟಿಸಿದ ಕಲಾಕಾರನ ಮನಸ್ಸು ಹೇಗಿರಬಹುದು ! ಒಮ್ಮೆ ಯೋಚಿಸಯ್ಯಾ ಗೆಳೆಯಾ ! ಸುಮ್ಮನೇಕೆ ಮತಿಭ್ರಾಂತಿ !? ಇಷ್ಟೆಲ್ಲಾ ಯೋಚಿಸುವ ನಮ್ಮ ಆತ್ಮ ಕುರೂಪವೇ ?! ಕಪ್ಪೇನು !? ಈ ಪ್ರಶ್ನೆಗಳಿಗೆಲ್ಲಾ ಉತ್ತರಿಸಲಾದೀತೆ !? ಅದಕ್ಕೆ ನಾವೇನು ಮಾಡಬೇಕೆಂದರೆ ಅತಿಬುದ್ಧಿವಂತರಂತೆ ದೂರುವುದನ್ನು ಬಿಟ್ಟು ಅನಂತ ಸೃಷ್ಟಿಯನ್ನು ಆಸ್ವಾದಿಸುತ್ತಾ , ಆನಂದಿಸುತ್ತಾ ಕಳೆಯಬೇಕು. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)