ಚಿಂತ್ಯಾಕೆ ಮಾಡುತ್ತಿದ್ದಿ !

ಶರಣಂಗೆ ಶರಣನಿಹ ಬಾಳ ಸಾಗರವೀಸೆ
ಗುರುವಿಹನು ಧರಣಿಯಾ ಕಷ್ಟಗಳ ಕಳೆಯೆ
ಅರಿ ಆತ್ಮಸಖನಿಹನು ಆತ್ಮಸಂಗಾತಕ್ಕೆ
ಮುರಣದೊಳು ದೇವನಿಹ ಜಾಣಮೂರ್ಖ//

ಭಗವಂತನು ಮನುಷ್ಯನಿಗೆ ಏನುಬೇಕೋ ಎಲ್ಲವನ್ನೂ ಕೊಟ್ಟೇ ಕಳಿಸಿದ್ದಾನೆ. ಜೊತೆಗೆ ಅರಿಷಡ್ವರ್ಗ , ಅಷ್ಟಮದ ಹೀಗೆ ಏನೇನನ್ನೋ ಕಳಿಸಿದ್ದಾನೆ. ನಾಟಕದ ಓಘಕ್ಕೆ ಒಂದಿಷ್ಟು ರಂಜನೆ , ದುಃಖ ಸಂತಸ ಹೀಗೇ ಏನೇನೋ ಬೇಕಲ್ಲಾ ಅದಕ್ಕೆ. ಈ ಬದುಕನ್ನು ಸಾಗಿಸೋದಕ್ಕೆ ಒಬ್ಬ ಶರಣನಿಗೆ ಮತ್ತೊಬ್ಬ ಶರಣನಿದ್ದಾನೆ. ಧರಣಿಯ ಕಷ್ಟಗಳ ನಿವಾರಣೆಗೆ ಗುರುಗಳಿದ್ದಾರೆ. ಆತ್ಮಸಂಗಾತಕ್ಕೆ ಯಾರುಯಾರನ್ನೋ ಹುಡುಕುತ್ತೇವೆ. ಒಳಗಣ್ಣ ತೆರೆಯಿರಿ ! ಹೊರಗಣ್ಣ ಮುಚ್ಚಿ ! ಒಂದು ಕಡೆ ಶಾಂತವಾಗಿ ಕೂರಿ ! ನಮ್ಮ ಆತ್ಮಸಖನು ನಮ್ಮೊಡನಿದ್ದಾನೆ. ಮನಬಿಚ್ಚಿ ಮಾತಾಡಿ. ಎದೆಯ ಹೊರೆಯನ್ನು ಕಳಚಿ ತೂರಿಬಿಡಿ ! ಇನ್ನು ಮರಣದ ನಂತರ ಏನೋ ಎಂಬ ಭಯವೇ !? ಅದಕ್ಕೊಂದು ಸುಂದರ ವ್ಯವಸ್ಥೆಯನ್ನು ಭಗವಂತ ಆಗಲೇ ಮಾಡಿಯಾಗಿದೆ. ಎಲ್ಲವೂ ಪೂರ್ವನಿಶ್ಚಿತ ! ಪೂರ್ವನಿರ್ಧಾರಿತ ! ನಾವು ಸುಮ್ಮನೇ ಜಗದ ನಾಟಕವನ್ನು ವೀಕ್ಷಿಸುತ್ತಾ , ನಮ್ಮ ಪಾತ್ರವನ್ನು ಸರಿಯಾಗಿ ನಿರ್ವಹಿಸುತ್ತಾ ಕಾಲ ಕಳೆಯಬೇಕಷ್ಟೆ ! ಪಾತ್ರನಿರ್ವಹಣೆ ಮುಗಿದ ಮೇಲೆ ಬೇರೆ ಪಾತ್ರಗಳಿಗೆ ರಂಗಸಜ್ಜಿಕೆಯನ್ನೊಪ್ಪಿಸಿ ನೇಪಥ್ಯಕ್ಕೆ ಸರಿಯಬೇಕು. ಸ್ನೇಹಿತರೇ ಈ ಜೀವನ ನಾಟಕದಲ್ಲಿ ನಿಮ್ಮ ಪಾತ್ರ ಹೇಗಿದೆ ಒಮ್ಮೆ ನೋಡಿಕೊಳ್ಳಿ ! ಚನ್ನಾಗಿದೆಯೇ !? ಹಾಗಿದ್ದರೆ ಸರಿ. ಇಲ್ಲದಿದ್ದರೆ ಇನ್ನಾದರೂ ಚಂದವಾಗಿಸಿಕೊಳ್ಳಬೇಕು. ಅಲ್ಲವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)