ಅರಿವಿನ ಹಣತೆ

ಬರಿದೆ ಕೆರಳಿಸುವೇಕೆ ಅರಳಬಿಡು ಮನಸನ್ನು
ಅರಿತರಿತು ದುರಿತಗಳನಾಚರಿಸುವೇಕೆ ?ಸಿರಿಯರಿವ ಹೃದಯದೊಳ್ಮೆರೆಸು ಮರೆವೇತಕ್ಕೆ ?
ಅರಿವ ಹಣತೆಯ ಬೆಳಗೊ ಜಾಣಮೂರ್ಖ //

ನಮ್ಮ ಮನೋವ್ಯಾಪಾರವನ್ನೊಮ್ಮೆ ಹಾಗೇ ಗಮನಿಸಿ ! ನಾವು ಮನಸ್ಸನ್ನು ಅರಳಿಸುತ್ತಿಲ್ಲ, ಬದಲಿಗೆ ಕೆರಳಿಸುತ್ತಿದ್ದೇವೆ. ಕೆರಳಿದರೆ ಮನಸಿಗೆ ಹಾನಿಯಷ್ಟೆ ! ಅದಕ್ಕೆ ಆದಷ್ಟೂ ಶಾಂತವಾಗಿರಿ. ತಿಳಿದೂ ತಿಳಿದೂ ಕೆಟ್ಟ ಮಾರ್ಗವನ್ನೇ ತುಳಿಯುವುದು ಒಂದು ದೊಡ್ಡ ವಿಪರ್ಯಾಸ ! ಆದರೂ ಸತ್ಯ ! ಹೃದಯದಲ್ಲಿ ನಿರ್ಮಲವಾದ ಪ್ರೀತಿಯೇನೋ ಇದೆ. ಆದರೆ ಅದು ಯಾಕೋ ಮುಚ್ಚಿಬಿಟ್ಟಿದೆ . ಯಾವುದರಿಂದ ಮುಚ್ಚಲ್ಪಟ್ಟಿದೆ ಅಂತ ನಿಮಗೇ ಗೊತ್ತು ! ನಾನತ್ವ , ಈರ್ಷೆ , ಅಹಂಕಾರ, ಮತ್ಸರ , ಲೋಭ ಅಯ್ಯೋ ಹೇಳುತ್ತಾ ಹೋದರೆ ಒಂದೇ ಎರಡೇ ಇವುಗಳಿಂದ ಮನಸ್ಸು ತುಂಬಿ ಹೃದಯವಂತಿಕೆ ಅನ್ನೋದು ಮುಚ್ಚಿಹೋಗಿಬಿಟ್ಟಿದೆ. ಆಗೊಮ್ಮೆ ಈಗೊಮ್ಮೆ ಜಾಗೃತಗೊಂಡು ಹೃದಯವಂತಿಕೆಯ ಬಗ್ಗೆ ಮಾತುಗಳು ಬರುತ್ತವಾದರೂ ಕೆಲವು ಕ್ಷಣಗಳಷ್ಟೆ ! ಮತ್ತೆ ಕಾರ್ಮೋಡ ಕವಿದು , ಮತ್ತದೇ ಅಂಧಕಾರ ! ಏನು ಹೇಳಬೇಕು ಈ ವರ್ತನೆಗೆ !? ಏಕಿಂತಹಾ ಮಾನಸಿಕ ವಿಕಲ್ಪ! ಮನೋ ವಿಕಲತೆ ! ಏಳಯ್ಯಾ ಗೆಳೆಯಾ, ಇನ್ನಾದರೂ ಎಚ್ಚೆತ್ತುಕೋ !? ಅರಿವಿನ ಹಣತೆಯನ್ನು ಬೆಳಗು ಏಳಯ್ಯಾ ! ಬದುಕಿನ ನಶ್ವರತೆಯನ್ನು ಅರಿಯದೇ ಅಂಧಕಾರದಲ್ಲೇ ಕೊಳೆವ ಪರಿಯಾದರೂ ಏಕೆ ? ಬುದ್ಧಿಜೀವಿಗೆ ಈ ಪರಿ ತರವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)