ಪೇಳ್ವುದತಿ ಸುಲಭವೈ ವೇದಾಂತ ತತ್ತ್ವಗಳ
ತಾಳ್ವುದೆಂತಜ್ಞಾತ ಮನಸಿನುಪಟಳವ ?
ಪೇಳ್ದಂತೆ ಕುಣಿವರನು ಹಣ್ಣಾಗಿಸುತ ಕುಣಿವ
ಕಳ್ಮನವ ಕಟ್ಟೇಳೊ ಜಾಣಮೂರ್ಖ //
ವೇದಾಂತ , ನೀತಿ ಇತ್ಯಾದಿಗಳನ್ನು ಹೇಳುವುದು ಸುಲಭ. ಆದರೆ ಪಾಲಿಸುವುದು ಬಹಳ ಕಷ್ಟ. ಆದರೆ ನಮ್ಮೊಂದಿಗೇ ಇದ್ದು , ನಮಗೇ ತಿಳಿಯದಂತೆ ಅಜ್ಞಾತವಾಗಿದ್ದು ನಮ್ಮನ್ನು ಕುಣಿಸಿ ಕಷ್ಟಗಳಿಗೀಡುಮಾಡಿ , ತನ್ನನ್ನು ಕಂಡು ತಾನೇ ನಕ್ಕು , ಅತ್ತು, ಕೆಲವೊಮ್ಮೆ ಹಾರಾಡಿ ಮತ್ತೆ ಕೆಲವೊಮ್ಮೆ ಶಾಂತವಾಗಿ ಹೀಗೆ ಹೇಗೇಗೋ ವರ್ತಿಸುವ ಈ ಮನಸ್ಸಿನ ಉಪಟಳವನ್ನು ತಡೆಯುವುದು ಮಾತ್ರ ಬಹಳ ಕಷ್ಟ . ಅದಕ್ಕೆ ಹಿರಿಯರು ಹೇಳುತ್ತಾರೆ. ಮನಸ್ಸು ಹೇಳಿದಂತೆ ಕುಣಿಯಬೇಡ, ನೀ ಹೇಳಿದಂತೆ ಮನಸ್ಸು ಕೇಳುವಂತೆ ನಡೆ ಅಂತ . ಎಷ್ಟು ಸತ್ಯ ಈ ಮಾತು ! ಅದರಿಂದ ಈ ಮನಸ್ಸು ಹೇಳಿದಂತೆಲ್ಲಾ ಕುಣಿಯುವುದು ಬೇಡ. ಇದಕ್ಕೆ ಸ್ವಲ್ಪ ಕಡಿವಾಣ ಹಾಕೋಣ. ನಿರ್ಬಂಧ ಹೇರೋಣ. ನಾವು ಹೇಳಿದಂತೆ ಕೇಳಬೇಕು ಇದು. ಆ ರೀತಿಯಲ್ಲಿ ಮನಸ್ಸನ್ನು ಅಣಿಗೊಳಿಸೋಣ. ಆಗ ನೋಡಿ ಬದುಕು ಒಂದು ಹಿಡಿತಕ್ಕೆ ಬರುತ್ತದೆ. ಅಲ್ಲವೇ ಗೆಳೆಯರೇ!?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
