ನಿನ್ನತನವೇನಾಯ್ತೊ

ತನ್ನ ಕೋಳಿಯು ಕೂಗೆ ಬೆಳಕು ಕಾಣೆಂಬುವರು
ಮುನ್ನ ಬೆಳಗಾಗುವುದ ಕಂಡಿಲ್ಲವೇನು ?
ತನ್ನದೇ ಸರಿಯೆನುತ ಪರರ ನಿಂದಿಪ ಮರುಳೆ
ನಿನ್ನತನವೇನಾಯ್ತೊ ಜಾಣಮೂರ್ಖ //

‘Empty mind make more sound’ ಅನ್ನೋ ಮಾತನ್ನು ಕೇಳಿರಬೇಕಲ್ಲವೇ ನೀವು !? ಖಾಲಿ ತಲೆ ತುಂಬಾ ಶಬ್ದ ಮಾಡುತ್ತದೆ. ಅಜ್ಜಿಯೊಬ್ಬಳು ತನ್ನ ಕೋಳಿಯ ಕೂಗಿನಿಂದಲೇ ಬೆಳಗಾಗುತ್ತದೆ ಅಂತ ಭಾವಿಸಿ ಬೀಗಿದ ಹಾಗೆ. ( ಕಥೆಯಲ್ಲಿ ಹಾಗಿದೆ ಅಷ್ಟೆ. ಪಾಪ ಕೋಳಿ ಅಮಾಯಕ ಪಕ್ಷಿ .) ಬಹು ಅಪಾಯಕಾರಿ ಪ್ರಾಣಿ ಈ ಮನುಷ್ಯ ಮಾತ್ರ. ನಾನೇ ಸರಿ , ನನ್ನಿಂದಲೇ ಪ್ರಪಂಚ ನಡೀತಾ ಇದೆ ಅನ್ನೋ ಭ್ರಮೆಯಲ್ಲಿ ಮನುಷ್ಯ ತನ್ನತನವನ್ನೇ ಮರೆತು ಮೆರೆಯುತ್ತಾನೆ. ಇತರೆ ಸಾತ್ವಿಕರನ್ನು ನಿಂದಿಸಿ ಜರಿಯುತ್ತಾ ತನ್ನ ನ್ಯೂನತೆಗಳನ್ನು , ಕೊರತೆಗಳನ್ನು ತುಂಬಿಕೊಳ್ಳುತ್ತೇನೆ ಅಂತ ಭಾವಿಸುತ್ತಾನೆ ಅಷ್ಟೆ. ಕರಿಗೆ ಕುರಿ ಸಮವೇ !? ಕ್ಷಮಿಸಿ ಗೆಳೆಯರೇ ಎಲ್ಲರೂ ಹಾಗಲ್ಲ ! ಅನ್ಯಥಾ ಭಾವಿಸಬೇಡಿ. ಕೆಲವರು ಹೀಗಿರುತ್ತಾರೆ ಅಷ್ಟೆ. ಅವರಿಗೆ ಅವರತನವೇ ಮರೆತು ಹೋಗಿಬಿಟ್ಟಿರುತ್ತದೆ ! ಜಗತ್ತಿನಲ್ಲಿ ತನಗಿಲ್ಲದ ಗುಣ ಬೇರೆಯವರಲ್ಲಿರುವುದು ಕಂಡಾಗ ನಿಂದಿಸುತ್ತಾರೆ. ಅವರ ಬಾಯಿಗೆ ಅಳುಕಿ ಯಾರೂ ಅವರ ತಂಟೆಗೆ ಹೋಗುವುದಿಲ್ಲ ಅಷ್ಟೆ. ಅದನ್ನೇ ಅವರು ತನ್ನ ಹಿರಿಮೆ ಅಂತ ಭಾವಿಸಿ ಬೀಗೋದಂತೂ ಹಾಸ್ಯಾಸ್ಪದ ! ಕೆಲವರ ದುರ್ಬಲತೆ ಮತ್ತೆ ಕೆಲವರ ಅಸ್ತ್ರವಾಗುವುದು , ಆ ಅಸ್ತ್ರದಿಂದ ಶೋಷಣೆ, ನಿಂದನೆ ಇತ್ಯಾದಿಗಳಿಂದ ತಮ್ಮನ್ನು ಉನ್ನತೀಕರಿಸಿಕೊಳ್ಳುತ್ತಿರುವುದು ಈ ಜಗತ್ತಿನ ದೊಡ್ಡ ದುರಂತ ! ಕೆಲವರು ಮೌನವಾಗಿ ಸಹಿಸಿಕೊಳ್ಳುತ್ತಾರೆ. ಆದರೆ ಆ ಸಾತ್ವಿಕರ ನೋವಿನ ಜ್ವಾಲೆ ನಿಂದಕರನ್ನು ದಹಿಸದೇ ಬಿಡದು. ಇಂತಹಾ ನಿಂದಕರೂ ಸಹ ಇರಬೇಕು. ಹಂದಿಯಿದ್ದರೆ ಕೇರಿ ಹೇಗೆ ಶುದ್ಧಿಯೊ ಹಾಗೆ ಅಂತ ದಾಸವರೇಣ್ಯರಾದ ಕನಕದಾಸರೇ ಹೇಳಿಲ್ಲವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)