ವಿಪರ್ಯಾಸ

ಇಂದಿಗಿಲ್ಲದ ಧನಮದಿರ್ದೊಡೇಂ ಪೋದೊಡೇಂ
ಮಂದಿ ಮಕ್ಕಳ ನೊಂದ ಒಡಲೊಳಗೆ ಬೆಂಕಿ
ತಿಂದು ತೇಗುವ ಮುಂದೆ ಸಂಬಂಧವಿಲ್ಲದವ
ಚಂದವಿರಲಿಂದು ಬಾಳ್ ಜಾಣಮೂರ್ಖ //

ಇದೊಂದು ದೊಡ್ಡ ವಿಪರ್ಯಾಸ ! ನಾವೆಲ್ಲರೂ ವಿಮರ್ಶಿಸಿಕೊಳ್ಳಲೇಬೇಕಾದ ಒಂದು ಸಂಗತಿ. ನಮ್ಮ ಬಳಿ ಬೇಕಾದಷ್ಟು ಹಣವೇನೋ ಇರುತ್ತದೆ. ಆದರೆ ಅದನ್ನು ನಾಳೆಗೆಂದು ಯಾರಿಗೂ ತಿಳಿಯದಂತೆ ಮುಚ್ಚಿಡುತ್ತೇವೆ. ಇಂದು ಕಷ್ಟ ಪಡುತ್ತೇವೆ. ನಮ್ಮ ಜನ , ನಮ್ಮ ಮಕ್ಕಳು ಕಷ್ಟ ಪಡುತ್ತಿದ್ದರೂ ಕೂಡ ಕೊಡದೇ ಸಂರಕ್ಷಿಸುತ್ತೇವೆ. ಆದರೆ ಮುಂದೆ ಅದು ನಮಗೆ ಸಂಬಂಧವಿಲ್ಲದವನ ಪಾಲಾಗಿಬಿಡುತ್ತದೆ. ಕೊಟ್ಟದ್ದು ತನಗೆ ಬಚ್ಚಿಟ್ಟದ್ದು ಪರರಿಂಗೆ ಅಲ್ಲವೇ !? ಮುಂದಿಗೆಂದು ಇಟ್ಟದ್ದು ಇಂದಿನ ಕಷ್ಟಕ್ಕಾದರೆ ಪ್ರೀತಿ ವಿಶ್ವಾಸವೂ ಉಳಿಯುತ್ತದೆ ! ನಮ್ಮವರ ಬದುಕಿಗೊಂದು ದಾರಿಯೂ ಸಿಕ್ಕಂತಾಗುತ್ತದೆ ಅಲ್ಲವೇ !? ಇಲ್ಲದಿದ್ದರೆ ಜೀನನೊಡವೆಯನ್ನು ಜಾಣ ತಿಂದನೆಂಬಂತೆ ಮೂರನೆಯವರ ಪಾಲಾದರೆ ಪ್ರಯೋಜನವೇನು !? ಅಲ್ಲವೇ ? ಇಂದು ನಾವಿದನ್ನು ಸಾಕ್ಷೀಭೂತವಾಗಿ ನೋಡುತ್ತಲೇ ಇದ್ದೇವೆ. ಆದರೆ ಅನುಭವಕ್ಕೆ ಬಂದ ಮೇಲೇನೇ ಮಾನವನಿಗೆ ಅರಿವಾಗೋದು. ಆದರೇನು ಜ್ಞಾನೋದಯವಾಗುವ ವೇಳೆಗೆ ಎಲ್ಲವೂ ಪರರ ಪಾಲಾಗಿರುತ್ತದೆ ! ಅದಕ್ಕೇನೇ ಕನಕದಾಸರು ತಮ್ಮ ಒಂದು ಕೀರ್ತನೆಯಲ್ಲಿ -” ತಾನೂ ಉಣ್ಣದ ಪರರಿಗಿಕ್ಕದ ಧನವಿದ್ಯಾತಕೆ” ಎಂದು ಮಾರ್ಮಿಕವಾಗಿ ಪ್ರಶ್ನಿಸಿದ್ದಾರೆ. ಆದ್ದರಿಂದ ವರ್ತಮಾನದಲ್ಲಿ ಬದುಕಬೇಕು. ಇದು ಭಗವಂತ ಕೊಟ್ಟದ್ದು ! ಕರ್ಮವೀರರಾಗಿ ಕಾಯಕತತ್ತ್ವದಲ್ಲಿ ತಿಳಿದು ಬದುಕಿದರೆ ಇಂದಿಗೂ , ಮುಂದಿಗೂ ಸಂತಸವು ಮನೆ ಮಾಡುತ್ತದೆ. ಬದುಕು ಸಾರ್ಥಕವಾಗುತ್ತದೆ. ಇರುವುದನ್ನು ಅರುಹಿದ್ದೇನೆ. ಯಾರಿಗಾದರೂ ನೋವಾಗಿದ್ದರೆ ಕ್ಷಮಿಸಿಬಿಡಿ. ಸತ್ಯವೆಂದಿಗೂ ಕಹಿ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)