ಸತ್ಯಾನ್ವೇಷಣೆ

ಸತ್ಯದಾಲಯದೊಳಗೆ ಸತ್ಯದನ್ವೇಷಣೆಯೆ?
ಸತ್ಯಾತ್ಮ ತನ್ನತಾನರಸಿದಂತಲ್ತೆ ?
ಸತ್ಯವೇ ಸ್ಥಿರಮೇರು ಮಿಥ್ಯವೇ ಚಾಂಚಲ್ಯ
ನಿತ್ಯವೂ ಅಲೆದಾಟ ಜಾಣಮೂರ್ಖ//

ಓ, ಗೆಳೆಯರೇ ! ಒಮ್ಮೆ ಇಂದಿನ ಸ್ಥಿತಿಯನ್ನು ಹಾಗೇ ಸುಮ್ಮನೇ ಗಮನಿಸಿರಿ ! ಕೈಲಿ ಬೆಣ್ಣೆ ಹಿಡಿದು ತುಪ್ಪಕ್ಕಾಗಿ ಉರೆಲ್ಲಾ ಅಲೆಯುತ್ತಾ ಇದ್ದೀವಿ ನಾವು. ಸತ್ಯಸ್ವರೂಪನ ದಿವ್ಯವಾದ ಆಲಯವಾದ ಈ ಭವ್ಯ ಪ್ರಪಂಚದಲ್ಲಿ ಸತ್ಯವನ್ನು ಹುಡುಕುತ್ತಿದ್ದೇವೆ. ಸುಳುಹೇನಾದರೂ ಸಿಗಬಹುದೇ ಎಂದು ! ಗಾಳಿ ಅನುಭವಕ್ಕೆ ಸಿಗುತ್ತೆ ! ಅದಿಲ್ಲದ ಜಾಗವೇ ಇಲ್ಲ ! ಆದರೆ ನೋಡೋಕಾಗಲ್ಲ , ಹಿಡಿಯೋಕೂ ಆಗಲ್ಲ ! ಅಲ್ವೇ ! ಹಾಗೇನೇ ಪಂಚಭೂತಗಳೆಲ್ಲವೂ ! ಅನುಭವಿಸಬೇಕಷ್ಟೆ ! ಹುಡುಕುವ ವ್ಯರ್ಥ ಪ್ರಯತ್ನವೇಕೆ !? ಓ ಗೆಳೆಯ ಅದು ಹೇಗೆಂದರೆ ನನ್ನನ್ನು ನಾನೇ ಹುಡುಕಿದಂತೆ ! ಸತ್ಯವು ಮೇರುವಿನಂತೆ ಸ್ಥಿರವಾಗಿದೆ ಕಣಯ್ಯ ಗೆಳೆಯ ! ಮನಸ್ಸು ಈ ಸತ್ಯದಲ್ಲೇ ಮಿಥ್ಯವೆಂಬುದೊಂದನ್ನು ಸೃಷ್ಠಿಸಿ ! ಎಲ್ಲದರಲ್ಲೂ ಇರುವ ಸತ್ಯವನ್ನು ಕಾಣದೆ ಮಿಥ್ಯವನ್ನೇ ಗುರುತಿಸಿ ! ಸ್ವಯಂ ತಾನೇ ಮಿಥ್ಯನಂತಾಗಿ , ತೊಳಲಿ , ಬಳಲಿ , ಬೆಂಡಾಗಿ ಮತ್ತೆ ಸತ್ಯಕ್ಕಾಗಿ ಅರಸುವ ಪರಿ ವಿಚಿತ್ರವೆನಿಸೋದಿಲ್ಲವೇನಯ್ಯ ! ಕ್ಷಮಿಸಿ ಗೆಳೆಯರೇ ಅವರಲ್ಲಿ ನಾನೂ ಸೇರಿಕೊಂಡಿದ್ದೀನಿ ! ನಿತ್ಯವೂ ಬಿಡದ ಹುಡುಕಾಟ , ಅಲೆದಾಟ , ಹೋರಾಟ , ಹೊಡೆದಾಟ ! ಅಯ್ಯೋ ನನ್ನೊಳಗಿನ ನಾನು ಯಾರೆಂಬ ಸತ್ಯ ಮುಚ್ಚಿ ಹೋಗಿದೆಯಲ್ಲಾ ! ಇದನ್ನರಿತು ತೊಳಗಿ ಬೆಳಗಬೇಕಯ್ಯಾ ಗೆಳೆಯಾ. ಬದುಕು ಆಗ ನಿಜವಾಗಿ ಬೆಳಕಾಗುತ್ತದೆ ! ದೇದೀಪ್ಯಮಾನವಾಗಿ ಕಂಗೊಳಿಸುತ್ತದೆ. ಶಾಂತಿಯ ನೆಲೆಯಾಗುತ್ತದೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)