ಅಳುವಿನೊಂದಿಗೆ ಹುಟ್ಟಿ ಅತ್ತು ನಕ್ಕೀ ಬದುಕ
ನೆಳೆವ ನಡುವಲಿ ನೋವನೀವೇಕೆ ಮರುಳೆ
ಅಳುವಿತ್ತರಳುವಿಹುದು ನಗಿಸು ನಗುವಿಹುದಯ್ಯ
ಕಳಿಸು ಮಾಗಿಸು ಮನವ ಜಾಣಮೂರ್ಖ //
ಅಳುವಿನೊಂದಿಗೆ ನಮ್ಮ ಜೀವನದ ಕರ್ಮಪಥ ಆರಂಭವಾಗುತ್ತದೆ. ಮತ್ತೆ ಬಾಳಿನುದ್ದಕ್ಕೂ ಅಳುತ್ತೇವೆ ನಗುತ್ತೇವೆ ! ನಗಿಸುತ್ತೇವೆ ! ಅಳಿಸುತ್ತೇವೆ. ಏನೋ ಬಿಡಿ . ಹೀಗೇ ಸಾಗುತ್ತದೆ ನಮ್ಮ ಜೀವನ. ಆದರೆ ಒಂದನ್ನಂತೂ ನಾವು ಯೋಚಿಸಬೇಕು. ಚಿರವಲ್ಲದ ಈ ಬದುಕಲ್ಲಿ ಇತರರಿಗೆ ನೋವನ್ನೇಕೆ ಕೊಡಬೇಕು !? ನೋಡಯ್ಯಾ ಗೆಳೆಯ ನೀನು ನೋವಿತ್ತರೆ ನೋವು , ನಲಿವಿತ್ತರೆ ನಲಿವು ! ನೀನು ಜಗತ್ತಿನಲ್ಲಿ ಪ್ರೀತಿಯನ್ನು ಬಿತ್ತಿದರೆ ಪ್ರೀತಿ , ದ್ವೇಷವನ್ನು ಬಿತ್ತಿದರೆ ದ್ವೇಷ . ಇಷ್ಟೆ ! ಇನ್ನೇನೂ ಇಲ್ಲ. ಇದು ಉಪದೇಶವಂತೂ ಅಲ್ಲ! ಇದು ಸತ್ಯ ಕಣಯ್ಯ ಗೆಳೆಯ. ಸತ್ಯವೆಂದಿಗೂ ಬೆಂಕಿ , ಸಿಡಿಲು . ತನ್ನ ಬಿಟ್ಟವನ ಅದು ಸುಡದೇ ಬಿಡದು. ಆದ್ದರಿಂದ ನಿನ್ನ ಮನಸ್ಸನ್ನು ಸ್ವಲ್ಪ ಕಳಿಸು ! ಮಾಗಿಸು ! ಆಮೇಲೆ ಎಲ್ಲಾ ತಾನಾಗೇ ಅರ್ಥವಾಗುತ್ತದೆ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
