ಹೂವೊಂದ ಭಾವದೊಳು ನೋಡು ಆಘ್ರಾಣಿಸೈ
ಭಾವಿಸೈ ಭಗವಂತನಿತ್ತ ಸಂತಸವ !
ಹೂವಿನೀ ಸೊಬಗು ಚಿರವಿರದೆಂಬ ಅರಿವಿರಲಿ !
ಭಾವ ವೈರಾಗ್ಯಮದು ಜಾಣಮೂರ್ಖ//
ಹೂವುಗಳನ್ನು ನೋಡಿದರೆ ಯಾರಿಗೆ ತಾನೆ ಸಂತೋಷವಾಗುವುದಿಲ್ಲ !? ಪ್ರೇಮದಿಂದ, ಭಾವಪೂರ್ಣವಾಗಿ ಅದು ಭಗವಂತ ನೀಡಿದ ಸಂತಸವೆಂಬಂತೆ ಸ್ವೀಕರಿಸಿ ಆನಂದಿಸಬೇಕು. ಜೊತೆಗೆ ಹೂವಿನ ಆ ಸೊಬಗು , ಸೌಂದರ್ಯ, ಸೌಗಂಧ, ಮಕರಂದ ಇತ್ಯಾದಿಗಳೆಲ್ಲವೂ ಚಿರವಲ್ಲ , ಆ ಹೂವು ಬಾಡಿ ಹೋಗುತ್ತದೆಂಬ ಅರಿವೂ ಸಹ ನಮ್ಮಲ್ಲಿರಬೇಕು. ಅದಿಲ್ಲದಿದ್ದರೆ ನಾವನುಭವಿಸಿದ ಸಂತೋಷವೂ ಹೂವಿನೊಡನೆಯೇ ಬಾಡಿಹೋಗುತ್ತದೆ. ಇದನ್ನೇ ಭಾವವೈರಾಗ್ಯ ಎನ್ನುವುದು. ಇಂತಹುದೊಂದು ಭಾವ ವೈರಾಗ್ಯ ನಮ್ಮ ಅಲೌಕಿಕ ಆನಂದಕ್ಕೆ ಕಾರಣವಾಗುತ್ತದೆ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
