ತಂಗಾಳಿ ತೀಡುವೊಲು ಮುಂಗಾರು ಪೊರೆವವೊಲು
ಬಂಗಾರ ಬೆಳೆಬಂದು ಬಂಗ ತೀರ್ವವೊಲು
ಹೊಂಗನಸ ಸಲಿಸುವೀ ತಾಯ ಚಾಗದವೊಲುವೆ
ಇಂಗದಿರಲೈ ಭಾವ ಜಾಣಮೂರ್ಖ //
ಪ್ರಕೃತಿ ಮಾತೆಗೆ ನಾವೆಷ್ಟು ಕೃತಜ್ಞರಾಗಿದ್ದರೂ ಸಾಲದು. ಬಳಲಿದಾಗ ತಂಗಾಳಿ , ಒಡಲ ಪೊರೆಯಲು , ಬಾಳ ಬೆಳಗಲು ಮುಂಗಾರು , ಮುಂಗಾರಿನ ದೆಸೆಯಿಂದ ಬಂದ ಬಂಗಾರದಂತಹ ಬೆಳೆ , ತೀರಿದ ಬಂಗ ಬವಣೆಗಳು ಬದುಕಿನಲ್ಲಿ ಕಟ್ಟಿಕೊಂಡ ಹೊಂಗನಸುಗಳು ತೀರಿ ಸಂತಸವನ್ನು ಯಾವ ಪ್ರತಿಫಲಾಪೇಕ್ಷೆಯೂ ಇಲ್ಲದೇ ಸಲಿಸುವ ಪ್ರಕೃತಿ ಮಾತೆಯ ತ್ಯಾಗ ಗುಣಕ್ಕೆ ನಾವೇನು ಕೊಡಲು ಸಾಧ್ಯ !? ಏನಾದರೂ ಕೊಡಲೇಬೇಕಲ್ಲವೇ !? ಹಾಗಾದರೆ ಏನು ಕೊಡೋಣ ! ಏನೂ ಬೇಡ ಗೆಳೆಯರೇ ! ಆ ತಾಯಿ ಏನನ್ನೂ ಬಯಸಳು. ಆದರೆ ಸಾಧ್ಯವಾದರೆ ಅವಳ ತ್ಯಾಗ ಗುಣವನ್ನು ಅಳವಡಿಸಿಕೊಳ್ಳೋಣ. ಸ್ವಾರ್ಥವನ್ನು ಬಿಡೋಣ. ಮಾನವ ಸಹಜ ದೈವೀಕ ಭಾವಗಳು ಬತ್ತದಂತೆಯೂ , ಕೃತಕತೆಯು ನುಸುಳದಂತೆಯೂ ಎಚ್ಚರವಹಿಸಿ ಬಾಳನ್ನು ನಂದನವಾಗಿಸೋಣ. ಅಲ್ಲವೇ ಗೆಳೆಯರೇ !
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
