ಎಳೆವೆತ್ತಿಗೇ ಬರೆಯು

ಎಳೆವೆತ್ತಿಗೆತ್ತೆತ್ತಿ ಬರೆಯೊ ಈ ಬದುಕಲ್ಲಿ !
ಕಳ್ಳೆತ್ತು ಸೌಖ್ಯವೀ ಬಾಳ ಪಯಣದಲಿ!
ಕಳೆವುದೆಂತೀ ಭವದ ಬವಣೆಗಳ ಭಾರವನು !
ತಿಳಿಯದೈ ಒಳಿತ ಗೈ ಜಾಣಮೂರ್ಖ //

ಇದು ಕಲಿಗಾಲ ! ಈ ಎತ್ತು ಬಂಡಿಯನ್ನು ಎಳೆಯುತ್ತದೆ ಅಂತ ಗೊತ್ತಾದರೆ ಸಾಕು. ಎಲ್ಲ ಭಾರವೂ ಅದರ ಮೇಲೆಯೇ ! ಬರೆಗಳು ಕೂಡ. ಸಾಮಾನ್ಯ ಬರೆಗಳಲ್ಲ ಅವು. ನಮ್ಮಂತೆಯೇ ಇದ್ದು , ನಮಗೇ ಎಳೆಯುವ ಮರೆಯಲಾಗದ ಬರೆಗಳು ! ಈ ಕಲಿಗಾಲದಲ್ಲಿ ಕಳ್ಳೆತ್ತುಗಳು ಹೇಗೋ ಚನ್ನಾಗೇ ಬದುಕುತ್ತವೆ. ಆ ಕಳ್ಳೆತ್ತುಗಳಿಗೇ ಒಳ್ಳೆ ಬೆಲೆ ಕೂಡ ! ದುಡಿವ ಎತ್ತುಗಳಿಗೆ ಬವಣೆಗಳ ಭಾರ ! ಇದರ ಒಳ ಮರ್ಮವೇ ಅರ್ಥವಾಗದು. ಓ ಗೆಳೆಯರೇ , ಇದನ್ನೇ ಕಲಿಗಾಲ ಅನ್ನೋದು. ಇದೆಂತಹಾ ವಿಚಿತ್ರ ! ತಂದೆ ತಾಯಿಗಳು ಮಕ್ಕಳನ್ನು ನಂಬುತ್ತಿಲ್ಲ ! ಬಂಧನಗಳು ಬಾಂಧವ್ಯಗಳು ನಶಿಸುತ್ತಿವೆ ! ನಮ್ಮೆಣಿಕೆಗೆ ಸಿಗದ ಏನೇನೋ ನಡೆಯುತ್ತಿದೆ ! ಚಣಕೊಂದು ಗಳಿಗೆಗೊಂದು ತೀರ್ಮಾನಗಳು ! ಒಂದೇ ಎರಡೇ ! ಆದ್ದರಿಂದ ಒಳ್ಳೆಯ ಧಾರ್ಮಿಕ ಭಾವನೆಗಳನ್ನು ಹೊಂದಿ ಬದುಕಬೇಕಾದುದು ಇಂದಿನ ಅನಿವಾರ್ಯ ! ಇಲ್ಲದಿದ್ದರೆ ಸಂಪೂರ್ಣ ಜಗತ್ತು ಅಪನಂಬಿಕೆಯ ಕರಾಳ ಕತ್ತಲಲ್ಲಿ ಮುಚ್ಚಿ ಹೋದೀತು ! ಅಲ್ಲವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)