ತಾನೆ ಪಾಲಿಸದಿರಲು

ಏನು ದೈವದ ಭಕ್ತಿಯೇನು ಕಾವ್ಯಾಸಕ್ತಿ
ಏನು ಗೀತಾ ಪಠಣವೇನು ಸಾಧನೆಯೊ !
ಏನು ವೇದಾಧ್ಯಯನವೇನು ಮಡಿವಂತಿಕೆಯೊ
ತಾನೆ ಪಾಲಿಸದಿರಲು ಜಾಣಮೂರ್ಖ//

ಎಷ್ಟು ದೈವದ ಭಕ್ತಿಯನ್ನು ತೋರ್ಪಡಿಸಿದರೇನು !? ದೈವವನ್ನು ಅರಿಯದಿದ್ದರೆ ! ಎಷ್ಟು ಕಾವ್ಯಾಸಕ್ತಿಯಿಂದ ಕಾವ್ಯಗಳನ್ನು ಓದಿ ವಿಮರ್ಶಿಸಿದರೇನು ! ಗೀತಾ ಪಠಣ ಪಾರಾಯಣಗಳನ್ನು ಮಾಡಿದರೇನು !? ವೇದಾಧ್ಯಯನ ಮಾಡಿ ಮಡಿವಂತಿಕೆಯಿಂದ ಬದುಕಿದರೇನು !? ಇವುಗಳೆಲ್ಲದರ ಅಂತರಾರ್ಥವನ್ನರಿತು ಬದುಕದಿದ್ದರೆ !? ಮಾನವೀಯ ಮೌಲ್ಯಗಳನ್ನು ಗಾಳಿಗೆ ತೂರಿ ಬದುಕಿದೆವಾದೊಡೆ ಏನೇ ಓದಿದರೂ ಎಲ್ಲಾ ವ್ಯರ್ಥ ಕಣಯ್ಯ ಗೆಳೆಯ. ! ಜೀವನ ಮೌಲ್ಯಗಳು ಬೇಕು. ಇಲ್ಲದಿದ್ದರೆ ನಾವು ಎಷ್ಟು ಕಾಲ ಬದುಕಿದರೇನು ! ಎಷ್ಟು ಕೋಟಿಗಳಿಗೆ ಬದುಕಿದರೇನು ! ಗೀತೆಯನ್ನು ಓದುತ್ತಿದ್ದೇವೆ ! ಸರಿ. ಎಷ್ಟು ಆಳಕ್ಕೆ ಇಳಿದೆವು ? ಏನು ಅರಿತೆವು ಬದುಕಿನ ಬಗ್ಗೆ ! ಸುಮ್ಮನೆ ಹಾಗೇ ಓದಿ ಬಿಡಲು ಅದೇನು ಕತೆಯೇ ! ಕಾದಂಬರಿಯೇ !! ಕಾವ್ಯಗಳನ್ನು ಓದಿದೆವು ನಿಜ, ಕವಿ ನೀಡಿದ ಸಂದೇಶವನ್ನು ಅರಿತೆವೇನು ! ಕತೆ ಅರಿತರೆ ಯಾವ ಪ್ರಯೋಜನವೂ ಇಲ್ಲ. ಚಿಕ್ಕ ಮಕ್ಕಳಹಾಗೆ ! ಹಾಗೆಯೇ ವೇದಾಧ್ಯಯನ ಮಾಡಿ ಅಂತೆಯೇ ಅಳವಡಿಸಿಕೊಂಡು ಬದುಕಬೇಕು ! ಇವೆಲ್ಲವೂ ಮಾತಿನಂತೆಯೇ ಕೃತಿಯಲ್ಲೂ ಇರಬೇಕು.ಆಗಲೇ ಇವುಗಳೆಲ್ಲದರ ಉದ್ದೇಶ ಈಡೇರಿ ಬದುಕು ಸಾರ್ಥಕವಾಗುತ್ತದೆ. ಅಲ್ಲವೇ ಗೆಳೆಯರೆ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)