ಮನಸಿನುದ್ಯಾನದೊಳಗಾಸೆಯಾ ಬೆಳಸೇಕೆ ?
ಕನಸುಗಳ ಬಿತ್ತೇಳು ನೋವಕಳೆ ಕೀಳು !
ನನಸಗೈವಾಸೆ ಬಿಡು ಕಾಯಕದಿ ನೆಲೆಸು ನೀ
ಹನಿಸೀವನೈ ದೇವ ಜಾಣಮೂರ್ಖ//
ಈಗ ನೀವೇ ನೋಡಿ ನಮಗೆ ಭಗವಂತ ಸಕಲವನ್ನು ನೀಡಿದರೂ ಆಸೆ ಮಾತ್ರ ಕಡಿಮೆಯಾಗುವುದೇ ಇಲ್ಲ. ಬೇಕೆ ಬೇಕೆಂಬಾಸೆ , ಕಡು ಸುಖವ ಕಾಂಬಾಸೆ ಇನ್ನೂ ಏನೇನೋ! ಈ ಮನಸ್ಸಿಗೆ ತೃಪ್ತಿಯೇ ಇಲ್ಲ. ಅದಕ್ಕೆ ನಾವೇನು ಮಾಡಬೇಕೆಂದರೆ ಕನಸುಗಳನ್ನು ಕಟ್ಟಿಕೊಳ್ಳಬೇಕು. ನನಸಿಗಾಗಿ ಪರಿತಪಿಸಬಾರದು. ಮನಸ್ಸಿನ ಈ ಉದ್ಯಾನದಲ್ಲಿರುವ ನೋವೆಂಬ ಕಳೆಕಿತ್ತು , ಕಾಯಕದಿ ನಿರತರಾಗಬೇಕು. ಮನಸಿನ ಬೆಳೆಸುಗಳಿಗೆ ನೀರ ಹನಿಸಿ ತಂಪಾಗಿಸಿ ಸದಾ ಶಾಂತಸ್ಥಿತಿಯಲ್ಲಿರಬೇಕು. ಆಗ ಕೊಡುವುದನ್ನು ಭಗವಂತನೇ ಕೊಡುತ್ತಾನೆ. ಅವನಿಗೆ ಗೊತ್ತುಂಟು. ಎಷ್ಟು ಕೊಡಬೇಕೆಂದು. ನಿಷ್ಠೆಯಿಂದ ಕಾಯಕವೆಸಗು , ಫಲಾಫಲಗಳನ್ನು ದೇವನಿಗೆ ಬಿಟ್ಟು ನಿಶ್ಚಿಂತೆಯಿಂದಿರಯ್ಯಾ ಗೆಳೆಯ. ಏಕೆಂದರೆ ಆ ಭಗವಂತನಲ್ಲಿ ನಿಷ್ಠೆಗೆ ಬೆಲೆಯಿದ್ದೇ ಇದೆ. ಮತ್ತೆ ಚಿಂತೆಯೇಕೆ ? ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
