ಮಾನದಾ ಮಾತೇಕೊ

ಆನೆಗಾನೆಯ ನೋವು
ಆಡಿಗಾಡಿನ ದುಃಖ
ಆನೆಯೇನಾಡೇನು
ವಿಧಿಗಾರು ಲೆಕ್ಕ ?
ನರನಾಗಿ ಜನಿಸಲೇನ್ !
ಕನಿಕರಿಸಿ ಬಾಳದಿರೆ
ಮಾನದಾ ಮಾತೇಕೊ
ಜಾಣಮೂರ್ಖ //

ಇದು ಈ ಜಗತ್ತಿನ ಒಂದು ದೊಡ್ಡ ವಿಸ್ಮಯ ! ವೈಚಿತ್ರ್ಯ ! ವಿಪರ್ಯಾಸ ! ದುರಂತ ! ಎಲ್ಲವೂ ! ನೀವು ಹೇಗೆ ಬೇಕಾದರೂ ಅರ್ಥೈಸಿ. ಈಗ ನೀವೇ ನೋಡಿ. ಆನೆಗೆ ಆನೆಯದೇ ದುಃಖವಾದರೆ. ಆಡಿಗೆ ಅದರದ್ದೇ ನೋವಿರುತ್ತೆ. ಅಂದರೆ ನೋವು ಯಾರನ್ನೂ ಬಿಟ್ಟಿಲ್ಲ. ವಿಧಿಗೆ ಯಾರೂ ಲೆಕ್ಕ ಅಲ್ಲ !! ಮನುಷ್ಯನಾಗಿ ಹುಟ್ಟಿ ಇನ್ನೊಬ್ಬರ ನೋವಿನೊಡನೆ ಆಟವಾಡಿದರೆ ಅದು ಮನುಷ್ಯತ್ವವೇನು ? ಮನುಷ್ಯನಾಗಿ ಹುಟ್ಟಿದರೆ ಮುಗಿಯಲಿಲ್ಲ ! ಮನುಷ್ಯನಾಗಿ ಬಾಳುವುದನ್ನು ಕಲಿಯಬೇಕು. ನರನಾಗಿ ಹುಟ್ಟಿ ಕಷ್ಟದಲ್ಲಿರುವವರನ್ನು ಕಂಡು ಕನಿಕರಿಸಿ ಬಾಳದಿದ್ದರೆ ಬೆಂಕಿಯಿಡಿ ಈ ಬಾಳಿಗೆ ! ಈ ಜನ್ಮಕ್ಕೆ ! ಪ್ರಯೋಜನವಿಲ್ಲದ ಮೇಲೆ ಮಾನ ಮರ್ಯಾದೆಗಳ ಮಾತೇಕೆ ? ಘನತೆಯಿಲ್ಲದ ಮೇಲೆ ಅದರ ಮಾತೇಕೆ !? ನೋವು ಹೆಪ್ಪುಗಟ್ಟಿ ಬಾಳು ಕೊನೆಯಾಗುವ ಮುನ್ನ ಏಳಿ ! ಎಚ್ಚೆತ್ತು ಬದುಕನ್ನು ಸಾರ್ಥಕಪಡಿಸಿಕೊಳ್ಳಿ. ವಿಧಿಯ ಹೊಡೆತದ ಎದಿರು ಎಲ್ಲರೂ ಕುಬ್ಜರೇ ! ಎದೆಯುಬ್ಬಿಸಿ ಅಹಂಕಾರದಿಂದ ಹೂಂಕರಿಸಿದವರೆಲ್ಲರೂ ವಿಧಿಯೆದಿರು ಮಣ್ಣಲ್ಲಿ ಮಣ್ಣಾಗಿ ಹೋದರು ! ಇನ್ನು ನಾವೆಲ್ಲಾ ಯಾವ ಲೆಕ್ಕ ! ಅಲ್ಲವೇ ಸ್ನೇಹಿತರೇ !!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)