ಅರಿವಿನ ಮುಕುರ

ಮಲಿನಗನ್ನಡಿಯೊಳಗೆ
ಮುಖವೆಂತು ಕಾಣ್ವುದೈ ?
ಕನ್ನಡಿಯನೊಡೆಯುವುದು
ಪರಿಹಾರವೇನು ?
ಮಲಿನವರಿವಿನ ಮುಕುರ
ಮೆಂತು ನೋಳ್ಪೆಯೊ ನಿನ್ನ !?
ತೊಳೆ ಕಾಣ್ವ ದೇವ ದಿಟ
ಜಾಣಮೂರ್ಖ //

ಈಗ ನೀವೇ ನೋಡಿ ! ನಿಮ್ಮ ಮುಖವನ್ನು ನೋಡಿಕೊಳ್ಳೋ ಕನ್ನಡಿಯೇ ಕೊಳೆಯಾಗಿದ್ದರೆ ನಿಮ್ಮ ಮುಖ ಸ್ಪಷ್ಟವಾಗಿ ಹೇಗೆ ತಾನೇ ಕಂಡೀತು ? ನನ್ನ ಮುಖ ಸರಿಯಾಗಿ ಕಾಣುತ್ತಿಲ್ಲ ಅಂತ ಕನ್ನಡಿಯನ್ನೇ ಒಡೆದು ಹಾಕುವುದು ಅದಕ್ಕೆ ಪರಿಹಾರವೇನಯ್ಯಾ ಗೆಳೆಯಾ !? ಕನ್ನಡಿಯನ್ನು ಸ್ವಚ್ಛಗೊಳಿಸಿದರಾಯ್ತು ! ಆಗ ಎಲ್ಲವೂ ಸುಸ್ಪಷ್ಟ ! ಹಾಗೆಯೇ ನಮ್ಮ ಅಂತರಂಗದ ಅರಿವಿನ ಕನ್ನಡಿಯೇ ಕೊಳೆಯಾಗಿದೆ. ಮತ್ತೆ ನಮ್ಮನ್ನು ನಾವು ನೋಡಿಕೊಳ್ಳುವುದೆಂತು ? ಆ ಅರಿವಿನ ಕನ್ನಡಿಯನ್ನು ಮೊದಲು ಶುದ್ಧಿಗೊಳಿಸಯ್ಯಾ ಗೆಳೆಯ. ಅಲ್ಲಿ ನಿಜವಾಗಿ ಭಗವಂತನೇ ಕಾಣುತ್ತಾನೆ. ಅರಿವಿನ ಮುಕುರವು ನಿರ್ಮಲವೂ, ನಿಶ್ಚಲವೂ ಆಗಿದ್ದಾಗ ಭಗವಂತನ ದರ್ಶನವು ಹೆಚ್ಚು ಸ್ಪಷ್ಟ ಮತ್ತು ನಿಶ್ಚಿತ ! ತಿಳಿಯಿತೇ ದೇವನು ಹೇಗಿರುತ್ತಾನೆ ಎಂದು !? ಖಂಡಿತವಾಗಿಯೂ ತಿಳಿಯುತ್ತದೆ. ನಮ್ಮ ಅರಿವಿನ ಕನ್ನಡಿಯನ್ನು ಸ್ವಚ್ಛಗೊಳಸಿದಾಗ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)