ಕಲಿಯುಗದ ಮಹಿಮೆಯೇನ್ ?

ಬೆಲೆಯೆಂತದೀ ಮಣ್ಣಿಗೀ
ಗೀ ನೀರಿಗೀ ಗಾಳಿ
ಗೀ ಬೆಂಕಿಗಾಗಸಕೆ
ಕಲಿಗಾಲವಯ್ಯೊ !
ಪಂಚಭೂತಂಗಳಿಗು
ಬೆಲೆಯೆ ! ವಿಪರೀತಮಿದು !
ಕಲಿಯುಗದ ಮಹಿಮೆಯೇನ್ ?
ಜಾಣಮೂರ್ಖ //

ಕಲಿಯುಗದ ವಿಪರೀತಗಳನ್ನು ನಾವಿಂದು ಕಣ್ಣಾರೆ ಕಾಣುತ್ತಿದ್ದೇವೆ. ಇದು ಯಾವ ಮಟ್ಟದ್ದಾಗಿದೆ ಎಂದರೆ ಪಂಚಭೂತಗಳಿಗೂ ಬೆಲೆ ಕಟ್ಟುವ ಮಟ್ಟಿಗೆ ಬೆಳೆದಿದೆ. ಬೆಳೆಯುತ್ತಿದೆ. ಕೋಟ್ಯಂತರ ವರ್ಷಗಳಿಂದಲೂ ಬದುಕಿಗೆ ಆಸರೆಯಿತ್ತ ಭೂ ಮಾತೆಯು ಅಡಿ , ಚ.ಅಡಿಗೆ ಇಷ್ಟು ಸಾವಿರ ರೂಗಳೆಂಬಂತೆ ವಿಕ್ರಯಗೊಳ್ಳುತ್ತಿದ್ದಾಳೆ ( ಪಾಪ ಆ ತಾಯಿ ಇನ್ನೂ ಏನೇನು ತಾಳಬೇಕೋ ! ) ಹೋಗಲಿ ನೀರನ್ನೂ ಲೀಟರಿಗಿಷ್ಟು ಎಂದು ಮಾರುವ ಸ್ಥಿತಿಯನ್ನು ಕಂಡು ಬದುಕು ಏಕೆ ಹೀಗಾಯಿತು ಎನಿಸುತ್ತಿದೆ. ಹೋಗಲಿ ಗಾಳಿಯ ಕತೆಗೆ ಬಂದರೆ ಇಂದಿನ ಆಸ್ಪತ್ರೆಗಳಲ್ಲಿ ಅದನ್ನೂ ವಿಕ್ರಯಿಸುತ್ತಿರುವುದು ವಿಪರ್ಯಾಸ ! ಆದರೂ ಸತ್ಯ ! ತಿಂಗತಿಂಗಳಿಗೂ ಬೆಂಕಿಗೂ ಬೆಲೆ ಕಟ್ಟುವ ಶೋಚನೀಯ ಸ್ಥಿತಿ ನಮ್ಮದು ! ಇನ್ನು ಭೂಮಿಯ ಮೇಲಿನ ಆಕಾಶ ! ಎಂದರೆ ಅವಕಾಶ , ಸುಂದರ ವಾತಾವರಣ ! ಅದಕ್ಕೂ ಜಗಳ , ಕಿತ್ತಾಟ. ಓ ಗೆಳೆಯ ಕೋಟ್ಯಂತರ ವರ್ಷಗಳಿಂದ ಪ್ರಕೃತಿ ಮಾತೆಯು ನಮಗೆ ಎಲ್ಲವನ್ನೂ ಸಮೃದ್ಧವಾಗಿ ಕೊಟ್ಟಿದ್ದಾಳೆ. ಪಂಚಭೂತಗಳ ರೂಪದಲ್ಲಿ ಭಗವಂತನೇ ನಮ್ಮೊಡನಿದ್ದಾನೆ. ಈ ಸೃಷ್ಟಿಸತ್ಯವನ್ನರಿಯದೇ ನಾವು ಎಲ್ಲವನ್ನೂ ಮಲಿನ ಮಾಡಿಬಿಟ್ಟೆವು ! ಮೂರು ದಿನದ ಬಾಳಲ್ಲಿ ಪಂಚಭೂತಂಗಳಿಗೂ ಬೆಲೆಕಟ್ಟಿ ಮಾರಾಟಗೈವ ನಮ್ಮ ಈ ಬಗೆ ವಿಪರ್ಯಾಸವಲ್ಲವೇ ವಿಚಿತ್ರವಲ್ಲವೇ ಗೆಳೆಯರೇ !? ಶಾಂತವಾಗಿ ಯೋಚಿಸಿ. ಇಲ್ಲಿ ಎಲ್ಲರಿಗೂ ಅವರದ್ದೇ ಆದ ಬದುಕಿದೆ. ತಿನ್ನುವುದು ಒಂದು ತುತ್ತು ಅನ್ನಕ್ಕೆ ಈ ಪರಿಯ ಹೋರಾಟವೇ!? ಈ ಪರಿಯ ಸ್ಪರ್ಧೆಯೇ !? ಇದು ಸರಿಯೇ !? ಇದೇನು ಕಲಿಯುಗದ ಮಹಿಮೆ ? ಇನ್ನೂ ಏನೇನು ನೋಡಬೇಕಿದೆಯೋ ಈ ಕಣ್ಣುಗಳಿಂದ !? ನೋಡಿ ಕೃತಾರ್ಥರಾಗಬೇಕಿದೆಯೋ ನಾವು. ಅಲ್ಲವೇ ಗೆಳೆಯರೇ !

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)