ಅನುಭಾವ

ಅಂತರಂಗದ ಬನದೊ
ಳಾತ್ಮದಾ ಹೂವರಳೆ
ಚಿತ್ಕಳೆಯ ಸೌಗಂಧ
ಸತ್ವವೇ ಬೀಜ !
ಮನದ ಮಕರಂದ ಅನು
ಭಾವವಾಗುತ ಚಲ್ಲೆ
ಅನುಭವಿಪನೊಂದು ಹೂ
ಜಾಣಮೂರ್ಖ //

ಇದೊಂದು ಅತಿ ಸುಂದರ ಕಲ್ಪನೆ ! ಅನುಭವಿಸಿದವರು ಅನುಭಾವಿಗಳಾಗಿಬಿಡುತ್ತಾರೆ. ನಿಮ್ಮ ಅಂತರಂಗವೇ ಒಂದು ಸುಂದರ ಬನ ! ಅದರಲ್ಲಿ ಆತ್ಮವೆಂಬ ಹೂವು ಅರಳಿದೆ ! ಆಗ ಮೂಡುವ ಚಿತ್ಕಳೆ ಇದೆಯಲ್ಲಾ ! ಅದರಿಂದ ಹೊಮ್ಮುತ್ತದೆ ದಿವ್ಯ ಸೌಗಂಧ ! ಅದರ ಸತ್ವವೆಂದರೆ ಆಂತರ್ಯದ ಬೀಜ. ಸಾವಿರ ಸಾವಿರ ಹೂಗಳನ್ನು ಸೃಷ್ಟಿಸೋ ಶಕ್ತಿ!
ಮನಸ್ಸೆಂಬ ಮಕರಂದ ! ಅಬ್ಬಾ ! ಇದು ಅನುಭಾವ ರಸವಾಗಿ ಚಲ್ಲಲು ಇದರ ಸಂಪರ್ಕಕ್ಕೆ ಬರುವ ಪ್ರತಿಯೊಬ್ಬರೂ ಹೂವಾಗಿ ಅರಳುತ್ತಾರೆ ! ಮತ್ತದೇ ಚಿತ್ಕಳೆ ! ಮತ್ತೆ ಸೌಗಂಧ , ಸೌರಭ ! ಮತ್ತೆ ಸತ್ವದ ಬೀಜ ! ಮತ್ತದೇ ಮಕರಂದ ! ಎಲ್ಲರ ಬದುಕೂ ಸಹ ಹೀಗೆ ಹೂವಾಗಿ ಅರಳಿದರೆ ಬಾಳ ಹೂದೋಟ ನಂದನವನವಾಗಿ ಅರಳುತ್ತದೆ. ಸಗ್ಗವೇ ಧರೆಗಿಳಿಯುತ್ತದೆ. ಮತ್ತೆ ಆ ದೇವನೂ ಸಹ ಸುಂದರ ಸತ್ವಯುತ ಚಿತ್ಕಳೆಯನ್ನು ಪಡೆದು ಅನುಭವಿಸಿ ಧನ್ಯನಾಗಲು ಇಳೆಗೆ ಇಳಿದು ಓಡೋಡಿ ಬರುತ್ತಾನೆ. ಈ ಬಾಳ ನಂದನದಲ್ಲಿ ತಾನೂ ಒಂದಾಗಿ ಹೂವಾಗಿಬಿಡುತ್ತಾನೆ . ಎಲ್ಲರ ಬದುಕೂ ಸಹ ಹೀಗೆ ಹೂವಾಗಿ ಅರಳಿದೊಡೆ ಎಷ್ಟು ಚಂದ ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)