ದುಡಿಮೆಯ ಫಲ

ಹೆಬ್ಬುಲಿಯು ತಾನೆಂದು
ಅಬ್ಬರಿಸಿ ಬೊಬ್ಬಿರಿದು
ಕೊಬ್ಬಿನಿಂ ಕೂಗೆ ತಾ
ತಬ್ಬುವುದೆ ಬೇಂಟೆ !?
ಹಬ್ಬದೂಟವೆ ಇರಲಿ
ಕೊಬ್ಬು ತಾ ದಣಿಯದಿರೆ
ಮಬ್ಬುದುವೆ ಬಾಳ್ಗೆ ಕಾಣ್
ಜಾಣಮೂರ್ಖ //

ದೇಹದಂಡನೆಯಿರದೆ ಕೂತು ತಿಂದರೆ ಆಹಾರದಲ್ಲಿ ರುಚಿ ಬರುವುದೇನು ? ದೇಹವನ್ನು ದಣಿಸಬೇಕು, ದಂಡಿಸಬೇಕು, ಕಾಯಕವೇ ಬಾಳ ಉಸಿರಾಗಬೇಕಯ್ಯ ಗೆಳೆಯ. ಆಗ ತಿನ್ನುವ ಅನ್ನದಲ್ಲಿ ಬರುತ್ತದೆ ನಿಜವಾದ ರುಚಿ. ತಾನು ಹೆಬ್ಬುಲಿ ಅಂತ ಅಬ್ಬರಿಸಿ , ಬೊಬ್ಬಿರಿದರೆ, ಕೊಬ್ಬಿನಿಂದ ಕೂಗಿದ ಮಾತ್ರಕ್ಕೆ ಬೇಟೆಯು ಓಡೋಡಿ ಬಂದು ಬೀಳುವುದಿಲ್ಲ ಅಲ್ಲವೇ !? ತಾನು ಪರಿಶ್ರಮ ಪಟ್ಟರೇನೇ ಹುಲಿಗೂ ಆಹಾರ. ನಾವು ಶ್ರೀಮಂತರೇ ಇರಬಹುದು ! ಕೂತು ತಿಂದರೆಂತು ? ಬದುಕಿನಲ್ಲಿ ಅದು ರೀತಿಯ ಮಂಕಿಗೆ , ಮಬ್ಬಿಗೆ ಕಾರಣವಾಗುತ್ತದೆ. ನಮ್ಮ ಹೃದಯವು ಕಾಯಕ ತತ್ತ್ವವನ್ನು ಸಾರುವ, ಸಾರುತ್ತಿರುವ ಒಂದು ಸುಂದರ ದೃಷ್ಟಾಂತ. ಅದರ ಬಡಿತ ನಿಲ್ಲುವುದೇ ಇಲ್ಲ. ನಿಂತರೆ ಮುಗಿಯಿತು ! ದುಡಿಮೆಯೇ ಭಗವಂತನ ಪೂಜೆ. ಅದರಿಂದ ಬಂದ ಫಲವನ್ನು ಪ್ರಸಾದವೆಂಬಂತೆ ಉಂಡು ತೃಪ್ತಿಯಿಂದ ಬದುಕಬೇಕು. ಆಗಲೇ ತಿನ್ನುವ ಆಹಾರಕ್ಕೊಂದು ರುಚಿ ! ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)