ತತ್ಕಾಲದೊಡೆಯ ನೀ

ಹಣದ ಬೇಂಟೆಯಲಿಂದು
ಗುಣವ ಮರೆತಿಹರಯ್ಯೊ !
ತೃಪ್ತಿಗಾಣದು ಮನವು
ಬೇಕು ಬೇಕೆಂದು !
ನಾಳೆ ಯಾರದೊ ಏನೊ
ತಿಳಿದವರು ಯಾರಿಲ್ಲಿ
ಒಡೆತನದ ಬೆಮೆಯ ಬಿಡು
ಜಾಣಮೂರ್ಖ //

ಇಂದು ಎಲ್ಲರೂ ಹಣದ ಬೇಟೆಯಲ್ಲಿರುವವರೇ ! ಪ್ರಮಾದವೇನೆಂದರೆ ಎಲ್ಲರೂ ಗುಣವನ್ನೇ ಮರೆಯುತ್ತಿರುವುದು ! ಎಷ್ಟು ಸಂಪಾದಿಸಿದರೂ ಸಾಕು ಎನ್ನುವುದೇ ಇಲ್ಲ. ತೃಪ್ತಿಗಾಣದು ಏಕೋ ಈ ಮನಸ್ಸು. ನಾಳೆಗೆ , ನಾಡಿದ್ದಿಗೆ , ತಿಂಗಳಿಗೆ ಎಂದು ತಲೆಮಾರಿಗಾಗುವಷ್ಟು ಸಂಗ್ರಹಿ ಬಿಡುತ್ತೇವೆ. ಮಿತಿಯರಿತು ಸಂಗ್ರಹಿಸಿದರೆ ಚಿಂತೆಯಿಲ್ಲ ! ಆಸೆಗೆ ಮಿತಿಯೇ ಇಲ್ಲ. ಎಲ್ಲಕ್ಕೂ ನಾನೇ ಒಡೆಯನು , ಎಲ್ಲವೂ ತನ್ನದಾಗಬೇಕೆಂಬುದು ಎಂತಹಾ ಭ್ರಮೆ ! ನಾಳೆಯೆಂಬುದು ಖಂಡಿತವಾಗಿಯೂ ನನ್ನದಲ್ಲ! ಅಂತೆಯೇ ನಾಳೆ ಏನಾಗುವುದೆಂಬುದನ್ನು ತಿಳಿದವರೂ ಸಹ ಯಾರೂ ಇಲ್ಲ. ಒಂದಂತೂ ನಿಶ್ಚಿತ ನಾವು ಏನೇ ಆಗಿರಲಿ. ತತ್ಕಾಲದ ಒಡೆಯರಷ್ಟೆ ! ಶಾಶ್ವತ ಒಡೆಯರಂತೂ ಅಲ್ಲವೇ ಅಲ್ಲ. ನನ್ನದೆಂಬುದು ಒಂದು ಭ್ರಮೆ ! ಇದನ್ನರಿತು ವ್ಯಾಮೋಹವನ್ನು ತೊರೆದು ನಿಜವಾಗಿ ಏನನ್ನು ಸಂಪಾದಿಸಬೇಕು ? ಯಾವುದರ ಒಡೆಯರಾದರೆ ಜನ್ಮ ಸಾರ್ಥಕವಾಗುತ್ತದೆ ! ಎಂಬುದರ ಕಡೆಗೆ ಮನಸ್ಸನ್ನು ಕೇಂದ್ರೀಕರಿಸೋಣ. ಬದುಕನ್ನು ಶಾಂತಿಯಿಂದ ಕಳೆಯೋಣ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)