ಸತ್ಯ ಶಾಂತಿಯೊಳಿಹುದೊ

ಬಾಳಿಲ್ಲದಾ ಸುಳ್ಳ
ಮೇಲೇಕೆ ಈ ಪ್ರೀತಿ ?
ಸಾವಿಲ್ಲದಾ ಸತ್ಯ
ಕಿಲ್ಲದಾ ಸೆಳೆತ ?
ಸುಳ್ಳ ತೆರೆಗಳು ತುಂಬಿ
ಬಾಳ ವಾಹಿನಿ ಮೊರೆಯೆ
ಸತ್ಯ ಶಾಂತಿಯೊಳಿಹುದೊ
ಜಾಣಮೂರ್ಖ //

ಸುಳ್ಳಿಗೆ ಬದುಕೇ ಇಲ್ಲ. ಆದರೂ ಅದರ ಮೇಲೆ ಅದೆಂತಹಾ ಪ್ರೀತಿ ? ಸತ್ಯ ಸುಂದರ ! ಸಾಕ್ಷಾತ್ ಶಿವಸ್ವರೂಪಿಯಾದರೂ ಅತ್ತ ಕಡೆ ಯಾರೂ ಬರರು. ಅದರ ಕಡೆ ಕಿಂಚಿತ್ ಸೆಳೆತವೂ ಇಲ್ಲ ! ಗೀತೆಯ ಪ್ರಮಾಣದೊಂದಿಗೆ ಸುಳ್ಳು ಹೇಳುವುದಕ್ಕೆ ಏನೆನ್ನ ಬೇಕು !? ಈ ಬಾಳ ವಾಹಿನಿಯ ತುಂಬ ಸುಳ್ಳಿನ ಪ್ರವಾಹವೇ ಭೋರ್ಗರೆದು ತನ್ನ ಹರವನ್ನು ಚಾಚಿದೆ. ಸತ್ಯವು ಶಾಂತಿಯೊಳಿದೆ. ಬೂದಿ ಮುಚ್ಚಿದ ಕೆಂಡದಂತೆ ! ಈ ಬಾಳ ನಾಟಕವನ್ನು ಸುಮ್ಮನೆ ನೋಡುತ್ತಿದೆ. ಏರಿದುದು ಇಳಿಯಲೇ ಬೇಕು ! ತೀರ ಉದ್ದವಾದದ್ದು ಬಗ್ಗಲೇ ಬೇಕು ! ಅಲ್ಲವೇ ! ಮಿಥ್ಯವು ಈ ಸತ್ಯವನ್ನರಿಯದು. ಪ್ರಾಜ್ಞರೂ , ಚಿಂತನಶೀಲರೂ ಆದ ಮಾನವರು ಈ ಸತ್ಯವನ್ನರಿಯಬೇಕಲ್ಲವೇ ?
ಮಿಥ್ಯಪ್ರಪಂಚದಾ
ತತ್ತ್ವವ ತಿಳಿಯದೇ
ಕತ್ತೆಯ ತೆರದಿ ಬದುಕಲೇನು ಫಲ?
ಸತ್ಯ ಸ್ವರೂಪನ
ಸಾಕ್ಷಾತ್ಕಾರನಾ
ನಿತ್ಯ ಧ್ಯಾನ ಮಾಡಲಾಗ ಫಲ !
ಎಂದಿದ್ದಾರೆ ಸಂತರು !
ಇಂದಿಗೆ ಈ ಮಾತು ಎಷ್ಟು ಪ್ರಸ್ತುತ ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)