ಶುದ್ಧತೆಯ ಸೂತ್ರ

ಅರಿವುದನು ಅರಿ ಮತ್ತೆ
ಮರೆವುದನು ಮರೆ ಮನವೆ
ಅರಿನಿನ್ನ ಕೆಡುಕುಗಳ
ನೆನೆ ಲೋಗರೊಳಿತ !
ಮರೆ ಗೈದ ಒಳಿತ ಮೇಣ್
ಲೋಗರನ್ಯಾಯ ಮರೆ
ಶುದ್ಧತೆಯ ಸೂತ್ರಮಿದು
ಜಾಣಮೂರ್ಖ //

ಓ ಗೆಳೆಯಾ , ಭಗವಂತ ಕೊಟ್ಟ ಈ ಬದುಕಿನಲ್ಲಿ ನಾವು ಕೆಲವನ್ನು ಅರಿಯಬೇಕು ಮತ್ತೆ ಕೆಲವನ್ನು ಮರೆಯಬೇಕು. ನಾವು ಗೈದ ಕೆಡುಕುಗಳನ್ನು ಅರಿಯಬೇಕು. ಅರಿತು ಮತ್ತೆ ಆ ತಪ್ಪು ಘಟಿಸದಂತೆ ಎಚ್ಚರ ವಹಿಸಬೇಕು. ಮತ್ತೆ ಇತರರ ಒಳಿತುಗಳನ್ನು ನೋಡಿ, ಅರಿತು ಅಳವಡಿಸಿಕೊಳ್ಳಬೇಕು. ಅವರಿಂದಾಗೋ ತಪ್ಪುಗಳನ್ನು ಲೆಕ್ಕ ಹಾಕುತ್ತಾ ಕುಳಿತರೆ ನಷ್ಟ ಯಾರಿಗೆ !? ಯಾರಾದರೂ ಮನೆಯಲ್ಲಿ ಕಸವನ್ನು ಇಟ್ಟುಕೊಳ್ಳುವರೇನು ? ಅಂತೆಯೇ ಕಸದೋಪಾದಿಯಲ್ಲಿರುವ ಚಿಂತನೆಗಳನ್ನು ಬಿಸುಟು ಮನವ ಶುದ್ಧಿಗೈಯಬೇಕು ತಾನೆ ?! ಹಾಗೆಯೇ ನಾವು ಗೈದ ಒಳ್ಳೆಯ ಕೆಲಸಗಳನ್ನು ಮರೆತು ನಿರ್ಲಿಪ್ತರಾಗೋಣ. ಸೂರ್ಯ ಚಂದ್ರಾದಿ ದೇವತೆಗಳಾಗಲಿ ! ಪಂಚಭೂತಗಳಾಗಲಿ ! ಸೃಷ್ಟಿ , ಸ್ಥಿತಿ ,ಲಯಕಾರಕರುಗಳು ತಾವು ಜಗತ್ತಿಗೆ ಮಾಡುತ್ತಿರುವ ಉಪಕಾರವನ್ನು ಎಲ್ಲಿಯಾದರೂ ಹೇಳಿ, ಡಂಗುರ ಸಾರುತ್ತಿರುವರೇನು ? ಇಲ್ಲ. ಅಲ್ಲವೇ ? ಮತ್ತೆ ನಾವೇಕೆ ಹೇಳಿಕೊಳ್ಳಬೇಕು !? ಎಲ್ಲರ, ಎಲ್ಲದರ ಒಳಿತಿಗೆ ನಮ್ಮ ಉಪಕೃತಿಯು ಮೌನವಾಗಿ ನಡೆಯುತ್ತಿದ್ದರೆ ಅದಕ್ಕಿಂತ ಧರ್ಮ ಯಾವುದಿದೆ !? ಬೇರೆಲ್ಲವೂ ಬಂದು ಹೋಗುತ್ತವೆ ಅಷ್ಟೆ. ಆದರೆ ಇದೇ ಅಂತರಂಗ ಶುದ್ಧತೆಯ ಸೂತ್ರ ! ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)