ಈಸು ಸಿಗುವನಕ ದಡ

ಕಾಸಿಗಾಗೇಸೇಸು
ಕಷ್ಟಕಾಣೀ ಬಾಳೊ
ಳೆಲ್ಲ ತವಸಿಗಳಿಲ್ಲಿ
ಬದುಕು ತಪಮಲ್ತೆ !
ಹಸಿವನೀಸಿದೊಡೇನು
ಈಸಿದಂತೇಂ ಬಾಳ ?
ಈಸು ಸಿಗುವನಕ ದಡ
ಜಾಣಮೂರ್ಖ //

ಹಣಕ್ಕಾಗಿ ಇಂದು ಜನ ಏನು ಬೇಕಾದರೂ ಮಾಡುತ್ತಾರೆ. ಅದೆಷ್ಟು ಕಷ್ಟ ಪಡುತ್ತಾರೆ !? ಬದುಕೊಂದು ತಪಸ್ಸು ! ಇಲ್ಲಿ ಒಂದೊಂದು ರೀತಿಯಲ್ಲಿ ಎಲ್ಲರೂ ತಪಸ್ವಿಗಳೆ ! ಆದರೆ ಹಣ ಗಳಿಕೆಯೇ ತಪಸ್ಸಾದರೆ ಎಂತು ? ಹಾಗಾದರೆ ಬೇರೆ ಏನೂ ಸ್ವಾರಸ್ಯವೇ ಇಲ್ಲವೇನು ಬದುಕಲ್ಲಿ ! ಗೆಳೆಯರೇ ಹಣವೊಂದು ವಸ್ತು ಅಷ್ಟೆ. ಬದುಕಲು ಅದು ಬೇಕು. ಆದರೆ ಅದೇ ಅಂತಿಮ ಗುರಿಯಾಗದಿರಲಯ್ಯ ! ಹಸಿವು , ಬಾಯಾರಿಕೆಗಳು ಎಲ್ಲರಿಗೂ ಇವೆ. ಅವುಗಳನ್ನು ಕಳೆದೊಡಾಯ್ತೇನು ? ಈಸಬೇಕು ಇದ್ದು ಜಯಿಸಬೇಕು. ಎಲ್ಲಿಯ ವರೆಗೆ ಈ ಪಾಡು !? ಎಂದರೆ ಗುರಿ ಮುಟ್ಟುವ ವರೆಗೆ , ದಡ ಸೇರುವ ವರೆಗೆ ! ಗುರಿ ಯಾವುದು !? ಎಲ್ಲಿಹುದು ದಡ !? ಎಂಬ ಪ್ರಶ್ನೆಗೆ ಉತ್ತರ ಬೇಕೆ ? ಹಾಗಿದ್ದರೆ ಶಾಂತವಾಗಿ ಕುಳಿತು ನಿನ್ನ ಮನದ ಸುಂದರ ಉದ್ಯಾನದಲ್ಲೊಮ್ಮೆ ವಿಹರಿಸಿ ಬಾರಯ್ಯ ಗೆಳೆಯ. ಉತ್ತರ ತಾನಾಗೇ ಸಿಗುತ್ತದೆ. ವಿಹರಿಸಿ , ಆ ಒಳದನಿಯನ್ನು ಕೇಳ್ವ ವ್ಯವಧಾನ ನಮಗೆ ಬೇಕಷ್ಟೆ. ಅಲ್ಲವೆ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)