ಹೂ ಮುಳ್ಳ ತತ್ತ್ವ ಬಾಳ್

ಸಗ್ಗವಿರಲೆದೆಯೊಳಗೆ
ಸಗ್ಗವೇ ಜಗವೆಲ್ಲ !
ನರಕವಿರೆ ನರಕವೈ
ನಾಕ ಬಹುದೆಂತು ?!
ಹೂವ ಪಿಡಿದರೆ ಹೂವು
ಮುಳ್ಳ ಪಿಡಿದರೆ ಮುಳ್ಳು
ಹೂ ಮುಳ್ಳ ತತ್ತ್ವ ಬಾಳ್
ಜಾಣಮೂರ್ಖ //

ಈಗ ಈ ವಿಚಾರ ಅದೆಷ್ಟು ಸತ್ಯ ನೋಡಿ ! ನಮ್ಮ ಹೃದಯದಲ್ಲಿ ಸ್ವರ್ಗ ಸದೃಶವಾದ ಭಾವನೆಗಳಿದ್ದರೆ ಜಗವೆಲ್ಲವೂ ಸ್ವರ್ಗದೋಪಾದಿಯಲ್ಲೇ ಕಾಣುತ್ತದೆ. ನರಕ ಸದೃಶವಾದ ಭಾವನೆಗಳಿದ್ದರೆ ನರಕವಾಗೇ ಕಾಣುತ್ತದೆ. ಒಳಿತಿದ್ದರೆ ಒಳಿತು , ಕೆಡುಕಿದ್ದರೆ ಕೆಡುಕು ಅಷ್ಟೆ. ನರಕ ಸದೃಶ ಭಾವನೆಗಳನ್ನು ಮನಸ್ಸಿನಲ್ಲಿಟ್ಟುಕೊಂಡು ಸ್ವರ್ಗವನ್ನು ಬಯಸಿದರೆ ಹೇಗೆ ಬರುತ್ತದೆ ? ಅಲ್ಲವೇ ? ಅದೇನೋ ಎನ್ನುವರಲ್ಲ ಬೆಲ್ಲದ ಕಟ್ಟೆಯ ಕಟ್ಟಿ , ಬೇವಿನ ಬೀಜ ಬಿತ್ತಿದರೆ ಬಂದ ಬೆಳೆ ಕಹಿಯಲ್ಲದೇ ಸಿಹಿಯಾದೀತೆ ? ಒಂದು ಗುಲಾಬಿ ಹೂವಿನ ಗಿಡದಲ್ಲಿ ಹೂವೂ ಇದೆ. ಮುಳ್ಳೂ ಇದೆ. ಹೂವ ಹಿಡಿದರೆ ಹೂವು , ಮುಳ್ಳ ಹಿಡಿದರೆ ಮುಳ್ಳು ! ಹೂವಿನಂತಹಾ ಭಾವನೆಗಳನ್ನು ತಳೆದರೆ ಜಗತ್ತು ನಮ್ಮ ಪಾಲಿಗೆ ಹೂವಿನಂತಿರುತ್ತದೆ. ಮುಳ್ಳಿನಂತಹಾ ಪ್ರವೃತ್ತಿ ನಮ್ಮಲ್ಲಿದ್ದರೆ ಜಗತ್ತೂ ಸಹ ನಮ್ಮ ಪಾಲಿಗೆ ಮುಳ್ಳಿನಂತೆಯೇ ಆಗುತ್ತದೆ. ಬದುಕು ಈ ಹೂವು ಮತ್ತು ಮುಳ್ಳಿನ ತತ್ತ್ವದ ಆಧಾರದ ಮೇಲೆಯೇ ಇದೆ. ದೃಷ್ಟಿಯಂತೆ ಸೃಷ್ಟಿ ! ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)