ಬಾ ಬೆಳಗುವೀ ಜಗವ

ಬೆಳಗುವಾ ಸೊಡರಿರಲು
ಬೆಳಗು ಜಗವನು ಬಿಡದೆ
ಸುಡಲೇಕೆ ಬಳಸುವದ ?
ಬೆಳಗಲರಿಯದಲೆ ?
ನೂರು ಬರಿಸಂಗಳೊಳ್
ತೊಳಗಿ ಬೆಳಗುವುದೆ ಬಾಳ್
ಪಾಳ್ಗಯ್ಯೆ! ಕೇಡಾರ್ಗೆ ?
ಜಾಣಮೂರ್ಖ //

ಓ, ಗೆಳೆಯ ನಿನ್ನ ಕೈಲಿ ಬೆಳಗುತ್ತಿರೋ ಸುಂದರವಾದ ಒಂದು ಸೊಡರಿದೆ. ನಿನ್ನ ಮನೆಯನ್ನು ಬೆಳಗು. ನಿನ್ನ ಜಗತ್ತನ್ನೇ ಬೆಳಗು. ನಿನ್ನ ಬದುಕೂ ಸಾರ್ಥಕ. ಆ ಸೊಡರಿನ ಬದುಕೂ ಸಾರ್ಥಕ ! ಆದರೆ ಬೆಳಗುವ ರೀತಿಯನ್ನರಿಯದೆ ಆ ಸೊಡರನ್ನು ಜಗವ ಸುಡಲು ಬಳಸಿದರೆ ! ಯಾರಿಗೆ ಕೇಡು ? ನೀನೇ ಹೇಳಯ್ಯ ಗೆಳೆಯ ! ಅಂತೆಯೇ ಭಗವಂತ ನೂರು ವರ್ಷಗಳ ದೀರ್ಘ ಆಯುಷ್ಯವನ್ನು ನಮಗೆ ಕೊಟ್ಟು , ಜೊತೆಗೆ ಜಗವನ್ನು ಬೆಳಗಲು ದಿವ್ಯವಾದ ಜ್ಞಾನಜ್ಯೋತಿಯನ್ನೇ ಕರುಣಿಸಿದ. ಅದರ ಸಹಾಯದಿಂದ ಬದುಕ ಬೆಳಗೆಂದು ಹರಸಿದ. ಆದರೆ ನಾವು ಮಾಡುತ್ತಿರುವುದೇನು ? ಆ ಜ್ಞಾನದ ಬಲದಿಂದ ಅಜ್ಞಾನದ ಕೇಡ ಕಳೆದು ಬಾಳಬೇಕಾದ ನಾವೇ ಅಜ್ಞಾನಿಗಳಾಗಿ ಅಪೂರ್ವವಾದ ಈ ಜಗದ ಸೌಂದರ್ಯವನ್ನು ಹಾಳ್ಗೈದರೆ ಯಾರಿಗೆ ಹಾನಿ ನೀನೇ ಹೇಳಯ್ಯ ಗೆಳೆಯ !? ಈ ಸುಂದರ ಸೃಷ್ಟಿಯನ್ನು ಆಸ್ವಾದಿಸಿ, ಆನಂದದ ಅನುಭೂತಿಯನ್ನು ಪಡೆದು , ಅನುಭಾವಿಗಳಾಗಬೇಕು ನಾವು ! ಒಂದು ವೇಳೆ ಈ ಅಗಾಧ ಸೃಷ್ಟಿಯಲ್ಲಿ ಸೂರ್ಯನಿಲ್ಲದಿದ್ದರೆ ಈ ಕತ್ತಲೊಡಲಿನ ಬದುಕು ಹೇಗಿರುತ್ತಿತ್ತು ! ಕಲ್ಪಿಸಿಕೊಳ್ಳಯ್ಯ ! ಅಂತಹಾ ಸುಂದರ ಬದುಕನ್ನಿತ್ತ ಅಗಾಧ ಶಕ್ತಿಗೆ ಕೃತಜ್ಞತೆಯಿಂದ ಮಣಿದು ಬದುಕಬೇಕು ನಾವು. ಹಾಳ್ಗಯ್ಯಬಾರದು. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)