ಬುದ್ಧಿ ಭಾವದ ಬೆಸುಗೆ

ಬೆಸುಗೆಯೊಂದೊಂದರಲು
ಹೊಸೆದಿಹನು ಬೊಮ್ಮ ತಾ
ಕಸುವ ಕೊಡಲೀ ಬಾಳ್ಗೆ
ಹಸನುಗೊಳಿಸಲ್ಕೆ !
ಬುದ್ಧಿಗುಂ ಭಾವಕುಂ
ಬೆಸುಗೆ ಮರೆತನು ಏಕೊ !?
ಹೃದಯದಿಂ ಬೆಸೆ ಏಳು
ಜಾಣಮೂರ್ಖ //

ಈ ಸೃಷ್ಟಿಯಲ್ಲಿ ಎಲ್ಲವೂ ಒಂದಕ್ಕೊಂದು ಹೊಂದಿಕೊಂಡು ನಡೆಯುತ್ತಿವೆ. ಅದಕ್ಕೇ ಈ ಅನಂತ ಸೃಷ್ಟಿಯು ಸ್ವಲ್ಪವೂ ಏರುಪೇರಾಗದಂತೆ ನಡೆಯುತ್ತಿದೆ. ಈ ಬದುಕಿಗೊಂದು ಕಸುವು ಕೊಡಲು , ಶಕ್ತಿ ನೀಡಲು ಭಗವಂತನೇ ಹೊಂದಿಸಿದ ಬೆಸುಗೆ ಈ ಬಾಳ ಬೆಸುಗೆ. ಇದರಿಂದಲೇ ಎಲ್ಲರ ಬಾಳೂ ಸಹ ಹಸನಾಗಿದೆ. ಆದರೂ ಸ್ವಲ್ಪ ಅಸಮತೋಲನ , ಏರುಪೇರುಗಳನ್ನು ನೋಡುತ್ತಿದ್ದೇವೆ. ಅಲ್ಲವೇ ? ಏಕೆ ಹೀಗಾಯ್ತು ? ಭಗವಂತನು ಬುದ್ಧಿ ಹಾಗೂ ಭಾವಗಳನ್ನು ಬೆಸೆಯುವುದನ್ನೇ ಮರೆತುಬಿಟ್ಟಿದ್ದಾನೆಯೋ ! ಅಥವಾ ಈ ಬೆಸುಗೆಯು ಅತ್ಯಂತ ಸೂಕ್ಷ್ಮಬೆಸುಗೆಯಾದುದರಿಂದ ಅದರ ಎತ್ತರಕ್ಕೆ ನಾವು ಏರಲಾಗುತ್ತಿಲ್ಲವೋ ಏನೋ ತಿಳಿಯುತ್ತಿಲ್ಲ. ಅಖಿಲಾಂಡಕೋಟಿ ಬ್ರಹ್ಮಾಂಡ ನಾಯಕನಾದ ಅವನಿಗೆ ಬುದ್ಧಿ ಭಾವಗಳನ್ನು ಬೆಸೆಯುವುದೇನೂ ಕಷ್ಟವಲ್ಲ. ಆದರೆ ನಮ್ಮ ದೃಷ್ಟಿಕೋನ ಆ ನಿಟ್ಟಿನಲ್ಲಿ ಸಾಗುತ್ತಿಲ್ಲ ಅಷ್ಟೆ. ಓ ಗೆಳೆಯ ಬುದ್ಧಿಬಲ ಇರಲಿ. ಆದರೆ ಎಲ್ಲವನ್ನೂ ಬುದ್ಧಿಬಲದಿಂದಲೇ ನೋಡದೆ ಹೃದಯದಿಂದ ನೋಡಿದರೆ ಸುಂದರ. ಆಗ ಅಂತಃಕರಣದ ಸೌಂದರ್ಯ ಮತ್ತಷ್ಟು ಹೆಚ್ಚುತ್ತದೆ. ಬುದ್ಧಿಗೆ ಹೃದಯದ ಬೆಸುಗೆ ಇದ್ದರೆ ಜಗತ್ತು ರಾಮರಾಜ್ಯವೇ ಆದೀತು. ಏನಂತೀರಿ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)