ಬರೆವ ಭಾವವು ಕವಿಗೆ
ಕೇಳ್ವ ಪುಣ್ಯವು ಕಿವಿಗೆ
ಗಾನಯೋಗಿಯ ಬಾಯೊ
ಳದೆ ನಾದವಯ್ಯಾ !
ಅವರವರಿಗವರವರ
ಪುಣ್ಯವಿರೆ ತಡವೇಕೆ
ಬೆಳಕ ಕಾಣೇಳಿನ್ನು
ಜಾಣಮೂರ್ಖ //
ಕವಿಗೆ ಬೇಕಾದದ್ದು ಕವಿ ಅಷ್ಟೆ ! ಬರೀ ಕಿವಿಯಲ್ಲ ! ಹೃದಯವಿರುವಂತಹಾ ಕಿವಿ. ಬರೆವ ಪುಣ್ಯ ಕವಿಯದಾದರೆ ಕೇಳುವ ಪುಣ್ಯ ಕಿವಿಯದ್ದು . ಇನ್ನು ಅದನ್ನು ಹಾಡಿ ನಲಿಯುವುದು , ಸಂಗೀತ ರಸಿಕರಿಗೆ ರಸದೌತಣವನಿಕ್ಕುವುದು ಹಾಡುಗಾರನ ಪುಣ್ಯ. ಅವನ ಪಾಲಿಗೆ ಈ ಜಗತ್ತೆಲ್ಲಾ ನಾದಮಯ ! ಭಗವಂತನು ಅವರವರಿಗವರವರ ಪುಣ್ಯವಿಟ್ಟಿದ್ದಾನೆ. ಮತ್ತೆ ತಡವೇಕೆ ? ನಿನಗಿಟ್ಟ ಪುಣ್ಯದ ಬೆಳಕ ಕಾಣುವ ಸಾಮರ್ಥ್ಯ , ಸುಂದರ ಹೃದಯ ನಿನ್ನೊಳಗೇ ಇದೆ. The kingdom of god within you ಆ ಬೆಳಕ ಕಾಣು ! ಕಂಡು ಜಗದೆಲ್ಲೆಡೆಯಲ್ಲೂ ಆ ಬೆಳಕ ಹರಡೇಳಯ್ಯಾ ಗೆಳೆಯಾ !
ಹಾ, ಇದೆಲ್ಲಕ್ಕೂ ಮುನ್ನ ಒಂದು ಮಾತು. ಬೆಳಕ ಕಾಣ್ವ ಮನಸ್ಸು ,ಹೃದಯ ಬೇಕಷ್ಟೆ. ಅದಕ್ಕೆ ಅಗತ್ಯವಾದ ಶಾಂತಿ ಸಮಾಧಾನಗಳನ್ನು ಕಂಡುಕೊಳ್ಳುವವನು , ಬಾಳಜಂಜಡಗಳನ್ನು ಗೆಲುವವನು ನೀನಾಗಬೇಕಯ್ಯಾ ಗೆಳೆಯ. ಆಗಲೇ ಬೆಳಕು ಕಾಣಲು ಸಾಧ್ಯ ! ಏನಂತೀರಿ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
