ಮೂಢ ಬಡವರು

ಬೇಡಿ ಬಡತನ ಬಹುದು
ನೀಡಿ ಸಿರಿತನ ಬಹುದು
ಕೊಡುವಳೈ ಭೂತಾಯಿ
ಸಿರಿಯ ಗಣಿಯದಕೆ !
ಪಡೆದುದಂ ಬಿಟ್ಟು ತಾ
ನಡಿಗಡಿಗೆ ಬೇಡುವರು
ಮೂಢ ಬಡವರು ಕಾಣೊ
ಜಾಣಮೂರ್ಖ //

“Begging brings poverty” ಎಂಬ ಮಾತನ್ನು ನನ್ನ ತಾತ ಸದಾ ಹೇಳುತ್ತಿದ್ದರು. ಬೇಡುವಿಕೆ ಬಡತನವನ್ನು ತಂದೊಡ್ಡುತ್ತದೆ ಎಂದು. ಇದು ಸತ್ಯವೂ ಹೌದು. ಬೇಡಿದಷ್ಟೂ ನಾವು ಬಡವರೇ ! ನೀಡಿದಷ್ಟೂ ಸಿರಿವಂತರೇ ! ಬೇಡಿದರೆ ಯಾರನ್ನು ಬೇಡಬೇಕು ? ನೀಡಿದರೆ ಹೇಗೆ ನೀಡಬೇಕೆಂಬುದರ ಬಗ್ಗೆ ಮಹಾತ್ಮರುಗಳು ಬಹು ಅದ್ಭುತವಾದ ವಿಚಾರಗಳನ್ನು ಮಂಡಿಸಿದ್ದಾರೆ. ಆದರೆ ಸಿರಿಯ ಗಣಿ ಭೂತಾಯಿಗೆ ಕೊಡುವುದಷ್ಟೇ ಗೊತ್ತು. ಅದಕ್ಕೇ ಅವಳು ವರಸಿರಿಧಾತ್ರಿ ! ನಮಗೆ ಪಡೆವುದಷ್ಟೇ ಗೊತ್ತು ! ಆದರೆ ಆ ತಾಯಿಯಿಂದ ಪಡೆದುದನ್ನು ಬಿಟ್ಟು ( ಕೂಡಿಟ್ಟು) ತೃಪ್ತಿಯಿಲ್ಲದೆ ಮತ್ತೆ ಮತ್ತೆ ಬೇಡಿಕೆಯ ಪಟ್ಟಿ ಇಡುತ್ತಾ ಸಾಗುವ ನಾವು ಮೂಢ ಬಡವರಲ್ಲದೇ ಮತ್ತೇನು ? ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)