ಮಂತ್ರಾರ್ಥವರಿಯದಲೆ
ಪಠಣ ಮಾಡಿದೊಡೇನು ?
ಜಪಿಸಲೇನೊಮ್ಮನದಿ
ಅಳವಡಿಕೆಯಿರದೆ !?
ಪಠಿಸದಿರಲೇನು ಮಿಗೆ
ಚಾಗಭಾವದಿ ಬದುಕ
ಲದುವೆ ಶಾಂತಿಯ ಜಾಡೊ
ಜಾಣಮೂರ್ಖ //
ಮಂತ್ರದ ಅರ್ಥವನ್ನು ಅರಿಯದೇ ಯಾಂತ್ರಿಕವಾಗಿ ಪಠಿಸಿದರೆ ಪ್ರಯೋಜನವೇನು ? ಅದರ ಅರ್ಥವನ್ನು ಅರಿಯಬೇಕು. ಕೇವಲ ಅರ್ಥವರಿತು ಬದುಕಿದರಾಯ್ತೆ ? ಅಳವಡಿಸಿಕೊಳ್ಳಬೇಕು. ಮಂತ್ರಪಠಣ ಮಾಡದಿದ್ದರೇನಂತೆ ತ್ಯಾಗಭಾವದಿಂದ ಬದುಕಯ್ಯ ಗೆಳೆಯ. ಅದೇ ನಿಜವಾದ ಪರಮ ಶಾಂತಿಯ ಜಾಡು. ಆ ಜಾಡಿನ ಗುಂಟ ಸಾಗಿದರೆ ಬದುಕು ಸಾರ್ಥಕವಾಗುತ್ತದೆ. ಉಪದೇಶವು ಗುರುಮುಖೇನವಾಗಿಯೇ ಆಗಬೇಕು. ಅದರ ಪಠಣವು ನೂರೆಂಟು ಬಾರಿಯೋ , ಸಾವಿರದೆಂಟು ಬಾರಿಯೋ ಮಾಡುವುದಕ್ಕಿಂತ ಅಳವಡಿಸಿಕೊಂಡು ಜ್ಞಾನ ಮಾರ್ಗದಲ್ಲಿ ಬದುಕುವುದು ಬಹಳ ಮುಖ್ಯ. ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
